Accueil Tamazight Talmant i irefden taqbaylit

Uli Rohde : Talmant i irefden taqbaylit

110
- PUBLICITÉ -

Tutlayt n tmaziɣt d yidles n teqbaylit sran i leqdic ur nḥebbes ara, akken ad ṭṭfen deg umrar n zzman ur ttneqraḍen ara. Ayagi yessebgan-it-id leqdic i tt-gen warraw-is, yal wa deg taɣult i iḥemmel, yal wa s ttawil d tezmert i as-yettunefken.

- PUBLICITÉ -

Acu kan ayen yessewhamen yessefraḥen ɣef yiwet n tikkelt, d akken llan wid ur nelli ara d Iqbayliyen, maca yella wayen i ten-id-ijebbden ɣur-s. Imi refden taqbaylit, nudan, qedcen fell-as mačči d cwiṭ, ǧǧan-d igerrujen ur nrekku, ur nkeffu. Seg Ben Sdira, ar Jean Marie Dallet, ar Madeleine Allaine d Lucienne Brousse, ar waṭas n yicennayen seg Lurup neɣ si Marikan i icerken leqdic d yinaẓuren iqbayliyen am Yidir, Akli D, Ali Amrane…atg.

Uli Rohde d yiwet i iḍefren abrid-a, d yiwet i irefden taqbaylit s tfenṭazit ɣas ur d-tlul ara d taqbaylit neɣ d tamaziɣt. D tin i d-yekkren deg tmura n lǧennet, tadra-ines seg tmurt n Lalman yettwassnen s waṭas n yimezdaɣ iqbayliyen. Tettidir Uli di tmurt n Fransa, dɣa din i tessen ddeqs n yimeɣnasen d yinaẓuren.

D ayen i tt-yeǧǧan ad d-tessekfel lesrar lqayen n teqbaylit, acku nettat d tin i iḥemmlen anadi di tẓuri d yidles akken bɣun ilin. Imi tufa di teqbaylit d tutlayt n umezruy, d tutlayt n yidles, d idles n unefli, dɣa annect-a yeǧǧa-tt ad tecrek, ad tekki deg yal anda tella temlilit neɣ tfaska neɣ tmeɣra i icudden ɣer teqbaylit. Talmant-agi, anda ma tedda tettban si lebɛid s teksiwt-nni n teqbayliyin i as-yernan di thuski i tekseb, i d-tewret seg ccbaḥa n talmaniyin.

Telmed kra deg teqbaylit, seg tikkelt ɣer tayeḍ, tettali-d ɣer usayes, tcennu tizlatin n Lwennas Meɛtub i teḥfeḍ seg wul, uqbel ad tebdu ameslay, labud ad d-tezwar seg wazul. Trezzu ula ɣer tmura n tmazɣa yal mi d-teḥḍer tegnit, ama di Merruk neɣ di Lezzayer. Talmant-agi i d-tekseb teqbaylit, tezga tessebɣas kra n wayen i icudden ɣer tmazɣa deg usebter-is n uẓeṭṭa inmetti Facebook, s tira neɣ s tvidyutin, ula d isem-is tefka-as rruḥ n teqbaylit, ad t-naf yura akka Uli ul-iw Rohde. Ayendin n Leqbayel i yeṭṭafaren leqdic-is. Uli Rohde d amedya n tidet i wid-nni yeqqaren tamaziɣt yeǧǧa-tt zzman.

D amedya n ṣṣeḥ i wid yekkaten ṭṭbel deg waman. D amedya n lebda i wid yebɣan ad ttwassnen ɣef uɛrur n teqbaylit d usenqed n tidet d wid iqeddcen s tkerkas. Tanemmirt i tmeɣnast-a, teɣzi n leɛmer d wafud anezmar i as-nessaram.

Khaled Achoui

- PUBLICITÉ -