Accueil Tamazight Tameγra n lebḥer urğin telli

Cwiṭ seg tmucuha n leqbayel

Tameγra n lebḥer urğin telli

39

D akken neẓra di ddunit merra, imdanen, sexdamen di tmucuha aṭas iγersiwen, acku i wakken tamεayt ad tεeddi u ad taweḍ γer yiswi, ttadren-d yal tikkelt iγersiwen akken ad sen-tishil tegnit, amedya γur-neγ s Leqbayel, nessexdam uccen i tḥerci, izem i tebγest d tezmert… Deg waya, ssawalen-d wat zik yiwet n tmacahut γef win yesderγil ṭṭmeε. Yiwen wass, yuḍen ugellid n lḥut, yewweḍ γer lmuḥal. Ihi, cekkṛen-as ul n wuccen d ddwa. Iceyyeε ixeddamen-is i wakken ad as-d-muqqlen uccen. Mi ttnadin γef rrif n lebḥeṛ, walan yiwen n wuccen la yeddewwiṛ din, ssawlen-as: “Ay uccen”. Uccen: ”Anεam”. Acu akka ara txeddmeḍ ay uccen ?

Aql-aγ la nettnadi lmektub.
Tlata wussan-ayagi, nekni d anadi fell-ak.
D lxiṛ kan?
A d agellid-nneγ i yebγan ad yeg tameγra, maca yebγa ad yesseḥdeṛ yakk iγersiwen n tmurt. Tura neεreḍ akk iγersiwen ala kečč i ixussen, ula d tameγra teḥbes γef lğal-ik, ihi sellek iman-ik, ayen tectaqeḍ din, ad teṛwuḍ, kullec yella. Uccen, yesderγel-it ṭṭmeε.
-Besseḥ ur ssineγ ara ad εummeγ.
-Awah ! Ay uccen, akken newwi meṛṛa imεerḍen ara ak-nawi. Semlalen iman-nsen, gan-as-d amkan gar-asen. Yerkeb, ruḥen. Akken kecmen talemmast n lebḥeṛ, yenṭeq yiwen uḥewtiw γer wayeḍ: “Ilaq-aγ ad nγiwel neğğa-t-in yenṭeṛ aṭṭas”. Uccen am win i as-d-yefkan abeqqa. Yemmekta-d mi i as-tenna yemma-s ul-nneγ d ddwa i leḥwat. Yenṭeq yiwen uḥewtiw γer wuccen: “Ay uccen, ayγer akka tessusmeḍ, εni ur yezhi ara wul-ik ?”.
Uccen ifuṛes asteqsi-nni : “Awah! Ala ul-iw ur t-id-wwiγ ara, ttuγ-t-in γef rrif n lebḥeṛ”. Dγa feqqeεen leḥwat imi ayen akken ḥwağen, ur d-yeddi ara. Neṭṭqen γur-s: “S tidett ay uccen, ur d-tewwiḍ ara ul-ik?”. Uccen: “Dayen ttuγ-t-in”. Leḥwat: “Ala ay uccen ad nuγal ad t-id-tawiḍ yis-s ara tezhud di tmeγra”. Uγalen-d s temγawla, akken i d-wwḍen γer rrif n lebḥeṛ, uccen ijelleb yerwel. Leḥwat: “Aniγer ay uccen ? Awi-d ul-ik tuγaleḍ-d γer tmeγra”. Uccen: “Awah! Tameγra n lebḥeṛ urğin telli”.
Yahia Yanes