I lmend n tallit-agi n Remḍan, iɛeggalen n tddukkla n twennaḍt “Amgud” d wid n tddukkla n waddal (J.S.T) n taddart Tahanouts, s tallelt n teseqqamut n taddar-agi, xedmen-d yiwet n tmeɣra n ccna meqqren. Ula d ilmeẓyen n taddart-agi, fkan-d afus n tallelt, yal wa s wacu i yezmer. Tɛedda tmeɣra-agi n cca i d-yellan ass-nni n lexmis, 16 maggu 2019, deg tegnatin igerrzen, anda ḥedren ddeqs n twaculin. Ula d ahil n tmeɣra-agi, yella-d d anesbaɣur si tama n ccna. Tella-d tmeɣra-agi deg tlemmast n taddart, deg umḍiq iwumi qqaren Ighil Lhadj Aoudia.
Yebda leqdic-agi ɣef 22h00 n yiḍ, s snat n tezlatin i d-cnant telmeẓyin yellan deg talilt n tddukkla tadelsant “Imnar n Tdukli” n Ait Aissa Mimoun, tedda akkenni armi d ṣṣḥur. D tameɣra n taddart, deg-s ma drus 10 n yicennayen ilmeẓyen n taddart-agi Tahanouts, ɣer tama n kra n yicennayen n tudrin i d-yezzin, gar-asen Karim Khelfaoui, Mohand Boussaad. Am wakken daɣen i tettunefk tegnit i tmenna n yisefra sɣur yimedyazen n taddart-agi dimma, gar-asen Tchamouh (Zatri Mouhamed) akked Brahim Cherdi, Oudiai Said… Gar yicennayen n taddart-agi i d-yecnan ad nebder Marsghsan (Amar Yarkel), Kasdi Kamel, Juba Touat, Oudiai Nassim d gma-s Farid, Massi Kasdi… Am wakken daɣen i d-yella ufraq n ddeqs n tɣawsiwin i yigerdan, leḥlawat, tičupiḍin…
Adaoun Abdelghani