Accueil Tamazight Tamurt yeččan arraw-is d ungal wis sin n Lahdir Sidali

Ajdid deg tira

Tamurt yeččan arraw-is d ungal wis sin n Lahdir Sidali

86

Ass-nni n lexmis, 3 deg waggur-agi n tuber ideg nella, i d ilul wungal-nniḍen deg tesga n temkerḍit n tmaziɣt. Ulamma yenqes cwiṭ usizreg ussan-a, imi liḥala n tmurt ur terkid ara, acu kan, sya ɣer da yettefrurux-d yiwen uferruǧ, i d-irennun ɣer taffa n wayen yuran s teqbaylit. Tikkelt-agi, d ungal-nniḍen i d-iger uneggal n teqbaylit Lahdir Sidali, ara yernun ɣer wayetma-s i usebɣer n tsekla taqbaylit, i yebdan tettaf iman-is tineggura-a. “Tamurt yeččan arraw-is”, d ungal wis sin n umaru aqbayli Lahdir Sidali, mbeɛd amenzu-nni iwumi isemma “Tirga n wul”. Ungal-agi amaynut, yeffeɣ-d ddurt iɛeddan ɣer tezrigin Tafat n Bgayet. Ma nger tamawt ɣef uzwel-agi, ad naf yezmer lḥal ameskar, yettales-d ɣef wamek tmečč tmurt, yerna d arraw-is i d as-igan akka. Ma nmuqqel tugna, yellan deg usebtar amenzu n tduli, ad nwali sin yimdanen meqqren; argaz d tmeṭṭut ɣer tama n semmus n yilmeẓyen-nniḍen, gar warrac d tullas. Ad d-nesmekti kan belli Mass Lahdir Sidali, ilul ass n 24 yebrir 1988 ? deg Uqbu, lwilaya n Bgayet. D aselmad n tutlayt tamaziɣt deg ugezdu n tutlayt d yidles amaziɣ n tesdawit n Targa n Abderrahmane Mira n lwilaya n Bgayet seg useggas n 2011, yesselmed daɣen deg yiwet n tesnawit n Barbacha deg lwilaya n Bgayet seg 2012. Seg useggas n 2018, yettekemmil tizrawin-ines deg tesdawit n Mulud Mɛemmeri n Tizi Uzzu, imi yettheggi agerdas n Doctorat deg tesnilest tamaziɣt. D “Tirga n wul” i d ungal-is amezwaru, yeffeɣ-d deg waggur-nni n meɣres 2018 ɣer tezrigin Tafat n Bgayet. Yewwi arraz n Rachid Alliche n wungal amaziɣ, di tezrigt n 2018/2019, i tettheggi yal aseggas tisbeddit takanadit i tmaziɣt “Tirgwa”.

A. A.