Akken i d-yeqqar uzwel-is, iseɣrez aneggaru i d-yessufeɣ di tlemmast n 2018 unaẓur Murad Ɛedwan s uzwel «Taqbaylit-nni», deg-s aṭas n wayen ara isel umeẓẓuɣ si tama n uẓawan, d wayen ara yettḥesses wallaɣ si tama n umeslay d yiwellihen ɣef teqbaylit d yidles s umata.
Ma newwi-d awal ɣef tezlit tamezwarut n mmi-s n Bgayet, iwumi isemma “Win yennan truḥ“, ad d-nebder taseddart-a i d-yewwin agzul fell-as.
D tanaslit si ljed n ljed i aɣ-d-tekka
D tigejdit fell-as i tbedd Tmazɣa
S tfenṭaẓit
D taqbaylit
D tamaziɣt
Semmit-as akken i awen-yehwa.
Deg tezlit tis snat “Asmenteg“, tettkemmil daɣen tiɣri n ucennay d usaki ɣef wamek i tent-yuɣ yidles-nneɣ talliyin-a tineggura. Yenna-as:
Neɣreq deg ujdid
A Seksu n uderyis
Taɛacurt, lɛid
Yennayer yettirxis
Ur nteddu srid
Yeɛreq-aɣ lqis
Ur iban ubrid
Ala ma ur nefris.
Deg tezlit tis kraḍet ara d-yasen, ad d-naf asentel n tayri d wamek yettbeddil zzman tilufa, ayen yebɣu yeḍmeɛ-it yiwen. Deg tis ukuẓet, “Ameqyas“, d ameslay ɣef tayri i d-yewwin azday gar sin, d wamek yettaf urgaz iman-is d tin ukud yecrek tudert-is. Deg tezlit “Ay at Rebbi“ ara d-iḍefren srid, d tamuɣli n unaẓur i yettemɛebbaren d wallaɣ-is ɣef tmetti tamirant d tlufa akk i d-yetteḥnunnuḍen s amdan, am lɣiba n laman, abdal n leḥbab, atg.
Deg tis sḍiset, d awellih i win akken yezgan ireffed iqejjiren-is di tudert, ɣas ulamma yal alluy turǧa-t trusi. Syinna, d tizlit iwumi yefka azwel “Anda llan“, ideg yella unadi n umekti d uxiqi ɣef wayen i d-tettak ddunit tettekkes-it. Ɣef zzman yettɛeddayen am lberq, yettbeddil addaden, yettawi ayen yebɣa, yettaǧǧa-d ccfawat. Deg tezlit “Lmektub“, d aberreḥ n unaẓur s tẓuri d waṭas n yiḥulfan ɣef kra n wuguren i izemren ad ḥazen yal amdan. Ma deg tizlit send taneggarut, “Taqbaylit-nni“, d tuɣalin ɣer usentel agejdan iɣef yebna yiseɣrez, s ussad n wawal ɣef teqbaylit. S tseddart-a ad nwali cwiṭ udem n tezlit:
Ay asmi i aɣ-yezdeɣ lḥir
Nesseḥbibir
Leɛwayed-nneɣ neḥrez-itent
Amsedrar ur yettmesxir
Tidak n dir
Ur yettqerrib ɣer ɣur-sent
Ma d ass-a yefla ulemsir
Ḥzen a yebrir
Deg-neɣ la segrurubent
Ɣer tudrin yewweḍ-d zzhir
Nefka abendir
I Xira ad teɛmer tarkent.
Ɣer taggara, yefren Murad Ɛedwan ad yerr tajmilt i terbaɛt n Mob deg tezlit tis 10. Yettnuzu akka tura walbum di ddeqs n yimeḍqan i win yebɣan ad inadi fell-as, imi yuklal s tidet asmuzget.
M. K.