Mbeɛd taqbuct-nni tamezwarut n useggas n 1990, ɛeddan 29 n yiseggasen fell-as, i wakken sawḍen ɣer tis snat di 2019. Tella-d temlilit n taggara n Teqbuct Tafriqit n yiɣlanen (CAN) deg tedwilt-is tis 32, di Lqahira tamanaɣt n tmurt n Maṣer.
Tebda temlilit-agui n taggara ɣef 20h00 n tmeddit, i d-yessemlalen gar Terbaɛt taɣelnawt tazzayrit akked tin n Sinigal deg unnar Agraɣlan n Lqahira. Yesekcem-d usleɣmay Belmadi deg timlilit-agi imurar yuɣen tannumi tturaren, mačči am terbaɛt n Singal ideg i d-yella ubeddel.
Urɛad mident snat ddqayeq mi iseffer unefray beddu n temlilit, yesaweḍ umurar Beghdad Boundjah ad d-yawi iswi awḥid n temlilit-agi. Syin akkin, ikemmel uḥric amenzu n temlilit s uɣlab n terbɛat taɣelnawt tazzayrit, armi qrib d taggara n uḥric-a, i ten-teḥres cwiṭ terbaɛt n Sinigal. Ikemmel uḥric wis sin n temilit s lḥers meqqren ɣef terbaɛt n yizzegzawen, maca ur ibeddel ara ugemmuḍ n temlilit-agi. Ilmeẓyen n usleɣmay Belmadi, fkan-d yakk tazmert-nsen deg unnar, dayen i t-yeǧǧan ad seddun timlilt akken bɣan, yerna ad ḥadren ɣef yiswi-nsen awḥid.
90 n ddqiqa n wurar, ṣeɛbent i sanat n trebuyeɛ, yeqwa deg-sent yimenɣi ɣef ddabex gar yimurar ula gar yisleɣmayen n snat n trebuyaɛ-agi. Tessuli tamlilit-agi n taqqara s rrbeḥ n terbaɛt n yizzegzawen s yiwen yiswi ɣer ulac sdat n terbɛat n Sinigal i weɛren aṭas. S wakka i d-rnan itri wis sin i terbaɛt-agi, mbeɛd timlilit ara yeqqimen deg umezruy. Mi tfuk temlilit-agi, ttwaferqent tmidayin n ddheb ɣef yimurar d ugraw n terbaɛt taɣelnawt tazzayrit, syin akkin, tettunefk teqbuct-agi i umurar Riyad Mahrez d yimeddukkal-is.
Am wakken, daɣen i tettunefk teqbuct n umurar Igerrzen i Benacer. Ad d-nesmekti kan belli tarbaɛt taɣelnawt tazzayrit terbeḥ akk timlilyin-is i setta n teqbuct-agi, yerna d tarbaɛt i d-yufraren si tama n temḥaddit, imi ala sin n yiswiyen i d asen-d-swan. Ulamma aṭas n yiwudam n waddal afriqi, ur yerǧin ara «Izzegzawen» ad awḍen armi d tagarant n teqbuct-agi.
Maca beggnen-d ayen-nniḍen imi i d- wwin amecwar yessewhamen si tazwara n teqbuct-agi, ladɣa mi rnan Cote d’Ivoire d Nijirya, snat-agi n terbuyaɛ i d-ssumren ad awint taqbuct-agi tafriqit n yiɣlalen. Iberreḥ usleɣmay n terbaɛt taɣelnawat Djamel Belmadi, yenna-d: “D timlilit n umezruy, imi d tagi i taqbuct tamzwarut ara nerbeḥ berra n tmurt-nneɣ, mbeɛd tinna n 1990 di tmurt-nneɣ.
Nesɛa tamurt i d-yefkan aṭas n yimurar, s wawal-nniḍen d tamurt n ddabex uḍar. Ulamma teṣɛeb temlilit-agi, maca nessaweḍ ad neɣleb yiwet n terbaɛt meqqren, isem-is Sinigal, yuraren taqbuct tamaḍlant iɛeddan.” Ikemmel yenna-d: “Tajmilt ad tuɣal i yimurar i d-yefkan nnig tezmert-nsen i tmurt-nsen, mebla nutni nekk ulac-iyi, imi lliɣ kan deffir-sen d amnir, ttwelliheɣ-ten daya”. Ɣer taggara maḍi, ad d-nesmekti belli tarbaɛt-agi taɣelnawt, tettraǧu-tt Teqbuct gar Imenẓawen deg useggas n 2021 ɣer tama n Teqbuct Tamaḍlant deg useggas n 2022, afud igerrzen sya ɣer sdat.
Adaoun Abdelghani