Mačči d tikkelt tamenzwarut ara d-yeffeɣ udlis n kra n umaru yemmuten, uqbel ad iwali adlis-is, maca tikkelt-a armi ɛeddan 18 n yiseggasen ɣef tmettant n umeskar, i d-yeffeɣ udlis yura di tudert-is.
Deg wussan-agi kan iɛeddan, i d-yeffeɣ ɣer ssuq udlis wis tlata n tmarut d tmedyazt Nadia Ben Mouhoub, iwummi tsemma “Tawacult yebḍa uɣilif”. D yiwet n tullist n 64 n yisebtar, tettnuzu s wazal n 200 Da. Ma d tazwert n udlis-a d yemma-s Ben Mouhoub Djouher, i d-yelhan s usuffeɣ n udlis-agi n yelli-s.
Adlis-a, d yiwet n tullist ideg i d-teḥka tmarut tudert n yiwet n twacult taqbaylit, iwumi sawalen “Iger”, i yebḍa uɣilif. Ɣer taggara yecreq yiṭij fell-as, yuli wass, imi yefra wugugur i d-yersen fell-asen. Am wakken diɣ ara naf sya ɣer da kra n tseddarin n tmedyazt, akked sin yisefra ɣer taggara maḍi n udlis-a. Ad d-nesmekti kan belli, Massa Ben Mouhoub Nadia, d amedyazt d tamarut.
Tlul ass n 20 deg tuber 1969 deg Yiwaḍiyen di Tizi Uzzu. Tesɛa agerdas n tutlayt n tsekla taɛrabt d win tefransist. Tella tettaru s tefransist akked tmaziɣt. tura ɣur-s azal n 100 n tullisin d 10 n tmezgunin d tala wungalen…atg, acu kan ur d-ffiɣen ara. Temmut ass n 27 seg tuber 2002, suffɣen-d sin yidisen n tullisen seld tamettant-is, wigi d “Asbaɣar” wis sin d “Tafunast n yigujilen.
A. A.