Tayidir d tamezgunt i yura-tt Mass Ḥaǧǧur Racid n taddart n Mzeggen deg tɣiwant n Yillulen n Umalu. Yella umaru-agi d aselmad n tutlayt deg uɣerbaz amazwaru, am wakken yella iqeddec aṭas deg unnar n tutlayt n tmaziɣt, ladɣa deg Ugraw adelsan amaziɣ deg lawan i ɣef yella ɣef uqerru-s Mass Yidir Ahmed Zayed. Ḥaǧǧur Racid, yella yettaru yakan aṭas n yiḍrisen d wayen-nniḍen, acu kan, ur as-tettunefk ara tegnit akken ad d-yessizreg ayen yura imi laqen ttawilat i wannec-a . Yewweḍ wass ideg yebges ɣer usuffeɣ n udlis iwumi isemma “Tayidirt . Tayidirt d amezgun i d-yewwi bab-is s wudem atrar. Ma ɣef yiswiyin n udlis-a, ad naf: Tamezwarut, amaru ira ad isellek kra n wawalen yejlan deg usemres n tutlayt deg tmetti taqbaylit; tayeḍ d asiweḍ n teɣri ɣef usentel i ɣef d-yewwi awal umaru deg udlis-a, imi icudd ɣer twacult. Am wakken neẓra tawacult, zeddin-tt waṭas n tɣawsiwin: Timrawt, akal, tidyanin iɣef yettili umḥertes. Deg tmezgut-a, llan aṭas n yiwudam, yal awadem s twuri-ines, Tayidirt : d yelli-s n tayri, teččur d asirem.
Megduda: Teffer tayri-s i Yidir, tessaram timlilit d yiman-is.
Yeḥya: Udem i as-d-yettban d anemgal n tilawt, yeffer tidet ɣef Tyidirt.
Ḥakim: d mmi-s n Yeḥya, tamuɣli-s tezzi ala ɣer cci.
Belɛid : d mmi-s n Yeḥya , ad yeg talut s Tinnat.
Amejjay: yessekfel-d tidet n Megduda , yeddren d Yeḥya maca tuyer Yidir.
Inigi : d udem asusam, iwala tuffirin n twacult, acu kan ur yezmir ara ad iqir.
Amcic : awal-is ur yesɛi azal di twacult.
Arrac d teqcicin : d asirem n usdukkel.
Tamezgut-a, yebḍa-tt bab-is ɣef kraḍ n yiḥricen, ad ḍrun deg uxxam n Megduda. Tettmeslay tmezgunt ɣef usaḍuf yerzan tawacut i tebɣa Tyidirt, ad as-tbeddel udem, ad t-terr mačči d asaḍuf n tezmert d yiɣil. Asemres n teqbaylit taqburt, deg kra n tefyar, ad yerr imeɣri d amnadi ɣer ugerruj n tmawalt taqbaylit, ɣef wawalen yettnqasen di tirect n umeslay.
El Hafid Hadjou