Accueil Tamazight Tebda iḍelli n lḥed, ad tessali ass n lexmis

IRJEN - Tazrigt tis 5 n tmeɣra n yidles akked umezruy

Tebda iḍelli n lḥed, ad tessali ass n lexmis

27

Seg yiḍelli n lḥed, 18 ɣuct 2019, i tebda tezrigt tis xemsa n tmeɣra n yidles akked umezruy i d-yettilin yal aseggas deg tɣiwant n Yirjen, ad tessali lexmis-agi sdat-nneɣ. Yebda usiher-agi adelsan, s tfugla n tullya tunṣibt n tezrigt-agi tamaynut n ddurt-agi tadelsant, iwumi fkan yimsuddsen-is asentel “Tiɣɣermi” neɣ “La Citoyenneté) s tefransist.

Ɣef 17h00 n tmeddit, yella-d urmud n yimezdaɣ n tama-agi n Yirjen, d tagnit ideg i d-mlalen wat temnaḍt-agi ɣer yiwen umkan, ɛnan yiwen ccɣel. Ma i wass-agi n letnayen, ɣef 11h00 uzal, ad yili usikew n usileɣ n yiɛeggalen n tdkdukliwin ɣef usemres n tsenselkimt (informatique) akked agtulɣu (multimédia). Ɣef 17h00 n tmeddit, ad yili usarag ɣef tiɣɣermi taqbaylit, sɣur yimsirgen-agi Racid Ulebsir akked Ḥusin Dufan. I uzekka n ttlata, 20 ɣuct 2019, ad ikemmel usikew-agi n usileɣ n umussu addukklan.

Am wakken, diɣ ara d-yili urmud “Tigawt n wat Yirjen”, ideg ara d-snekden yimezdaɣ n tama-a isenfaren-nsen. Seldazekka n larebɛa, 21 ɣuct 2019, ddima ad ikemmel usikew-nni n usileɣ, i d-yettilin deg uzal. Ma deg tmeddit n wass, ɣef 17h00 n tmeddit, ad tili tejmilt meqqren i Yucef Gasem, yellan d imsuffeɣ. Ad yili umeslay fell-as deg tnagiyin n yimeddukkal-is akked yirfiqen-is n uxeddim, am wakken diɣ, ara d-seknen isura d yimuhal yexdem umerḥum-agi i d-yeǧǧan isem-is deg unnar n usuffeɣ d ufares.

Ass n lexmis, 22 ɣuct 2019, mbeɛd mi yessuli usikew-nni n usileɣ n yiɛeggalen n umussu addukklan, ad yili usarag ameẓyan s ssenf n (table ronde), ɣef lexsas n ufares akked lebɣi n usiweḍ n yidles-nneɣ i tsutwin i d-iteddun, ad yili wa sɣur ddeqs n yimura d yimeskaren n teqbaylit. Ad tessali ahil-is, tezrigt-agi tis 5 s tfugla n taggara, ara d-yilin lexmis-agi sdat-nneɣ deg tmeddit n wass maḍi.

Ɣef teɣzi n xemsa n wussan i tekka ddurt-agi tadelsant, llan leqdicat-nniḍen yecban timsikniyin n yidlisen akked wayen-nniḍen, timsikniyin n yimuhal n yimezdaɣ n tama-agi n Yirjen, asenɛet n yisura ɣef lxedma yelhan, askan n ufran d useddu n yiḍumman, aseḥbiber ɣef twennaḍt…atg. Ɣer taggara maḍi, ad d-nesmekti belli tameɣra-agi n yidles akked umezruy, tettheggay-itt-id yal aseggas tddukkla tadelsant “Irjen tura” s lemɛawna n umussu addukklan n tama-a ɣer yidlis n Useqqamu aɣerfan aɣiwan n Yirjen.
Adaoun Abdelghani