Accueil Tamazight Teffeɣ-d taggayt tamezwarut n yiselmaden n tmaziɣt

Tasdawit n Buzerriɛa

Teffeɣ-d taggayt tamezwarut n yiselmaden n tmaziɣt

140

Ad d-ternu taggayt n yiselmaden n tmaziɣt i useǧhed n uselmed n tmaziɣt ugar. D taggayt tamezwarut i d-yeffɣen taggara n useggas-a asdawan 2018/2019, deg wussan-a kan yezrin seg tesga n tmaziɣt deg uɣerbaz unnig n yiselmaden di tesdawit n Buzerriɛa. Deg yiwen n wulɣu n Useqqamu unnig n timmuzɣa, nnan-d d akken yettunefk yisem n Mulud Mɛemri i taggayt-a. D asmekti, d tajmilt i wayen akk yexdem Dda Lmulud i tmaziɣt, acku d netta i d amezwaru i tt-yeslemden dagi di Buzerriɛa deg yiseggasen-nni n 70.

I lmend n wayagi dɣa, akken ad teẓẓu iman n leqdic d leḥmala n tmaziɣt, yessuddes-d Useqqamu yiwet n tuffɣa tasensegmant tadelsant i lfayda n 40 n yinelmaden – iselmaden-a i d-yufraren s lmnedad n tmasayt n tesga n tmaziɣt deg Uɣerbaz unnig n yiselmaden akked uselway n tddukkla n yiselmaden n tmaziɣt n twilayt n Lezzayer. Tuffɣa-a, tella-d ass n sed, 29 yunyu 2019, anida i d-tella tirza ɣer taddart n Uzemmur Umeryem i yewwin arraz amenzu n taddart zeddigen deg twilayt n Tizi Uzzu aseggas n 2018.

Syin tkemmel tirza ɣer wammas adelsan n tɣiwant n Wat Yanni, anida i d-yella wahil adelsan d anesbaɣur , uqbel ad ṭṭfen abrid ɣer uẓekka n Dda Lmulud i usterḥem ɣef yiman-is d usersi n tmeqqunt n yizeǧǧigen. I usmekti taggayt-a i d-yeffɣen i tikkelt tamezwarut seg tesdawit n Lezzayer, d tin yebdan timsirin d wahil deg yennayer 2016, s lmendad n waṭas n yiselmaden d yimeɣnasen iqdimen n tmaziɣt, gar-asen Ḥamid Ubaɣa d Nadya Yermec.

D aya ara iɛiwnen asewseɛ n leqdic yecban wagi i d-yellan deg uɣerbaz Unnig n yiselmaden ɣer twilayin-nniḍen n tmurt s tullya n yigezduyen deg tsuddwin tunnigin n yiselmaden, akken ad yernu afud. Ladɣa ma neẓra belli iselmaden-a, ad ttwawelhen srid ɣer yidgan n uselmed deg yiɣerbazen imenza war ma sɛeddan timsizzelt n yiselmaden am wid i d-yetteffɣen seg tesdawit.

Dɣa ɣef tneqqiḍ-a swaswa, llan kra seg yiselmaden i d-yeffɣen seg tesdawit, wa 4, wa 5 n yiseggasen-aya, maca urɛad i ten-id-iṣaḥ wadeg n lxedma, ɣas akken aswir-nsen igerrez. Ugur dagi, yettuɣal ɣer teɣlift n usedwel ur d-nettmuddu ara idgan i uselmed n tutlayt n tmaziɣt.

Asuter i tukksa n tarrayt n ufran i ulmad n tmaziɣt

Yedda-d deg wulɣu n Useqqamu unnig n timmuzɣa, s lmendad n umaray-is amatu, gar yisuturen-nsen igejdanen, d asuter n tukksa n tarrayt n ulmad s ufran i tutlayt-a n tmaziɣt, acku ayagi ur yettɛawan ara akken ad temhaz, imi rray yettuɣal ɣer yimawlan d warrac ma bɣan ad lemden neɣ ala, d ayen i d-igellun s yiɛewwiqen d imeqqranen ladɣa i yiselmaden yettmahilen deg temnaḍin tiɛerbawalin, imi werǧin ssawḍen ad slemden s yiwen n uswir, annect-a ur ten-yettaǧǧa ara ad awḍen s iswi-nsen.

Ɣef waya, yewwi-d ad yili uɛawed n umuqel di temsalt-a, akken i ttwaselmadent tutlayin-nniḍen di tmurt, ad tettwaselmad ula d tutlayt n tmaziɣt.
KH. A.