Deg yiseggasen-agi ineggura, yella-d lḥir meqqren sɣur imezdaɣ n tɣiwant n Mɛatqa, akken ad beddlen udem n tɣiwanin n dayra-nsen yenḥafen s waṭas. Dɣa seg tectliwin n usizdeg n tudrin, i d-iḥellan imeḍqan deg temsizzelt n taddart tazedgant, ɣer tiwizi n useḥbiber ɣef twenaḍt, d tfaskiwin n tzemmurt n ufexxar. Tikkelt-agi, d taddart n Yiɣil n Teqḍibin yettabaɛen ɣer tɣiwant n Mɛatqa, i d-yefkan afus n tallelt i tɣiwant, s tukci n wakal i lebni n unnar n ddabex uḍar, deg umḍiq iwumi qqaren Assif. Deg tazwara n ddurt iɛeddan, heggan-d yimezdaɣ n taddart n Yiɣil n Teqḍibin d yimezdaɣ n tudrin n Iberquqen tiwizi i usewseɛ d uwenneɛ n unnar-agi n ddabex uḍar, anda smarsen yakk ttawilat iwatan yellan gar yifassen-nsen, akken ad fkan tagnit i yilmeẓyen n tɣiwant, ad tturaren deg-s. Seg lǧiha-nsen, ferḥen nezzeh yimezdaɣ n tɣiwant n Mɛatqa seg tcetliwt-agi n Yiɣil n Teqḍibin. Ula d aselway n Useqqamu aɣerfan Aɣiwan n Mɛatqa , Mass Laguel Lyes, ibeggen-d lferḥ-is s tigawt-agi, u yewɛed s uwenneɛ akken iwata annar-agi n ddabax uḍar i la ttraǧun yilmeẓyen n tɣiwant ugar n 30 d aseggas aya. Ad d-nesmekti kkan d akken dayra n Mɛatqa yesɛan ugar n 54 000 n yimezdaɣ, ur tesɛi ara ar ass-a annar n ddabex uḍar iwatan. Ala yiwen n umḍiq kan i yellan anda tturaren, ula d winna ur iwulem ara, ur yeqɛid ara. Yerna ffkan-t i lebni n usenfar n Sbitar n dayra n Mɛatqa.
Ali Zalouk