Accueil Tamazight Tefra ɣef usenfar n lgaz agaman

Ayt Smaɛel

Tefra ɣef usenfar n lgaz agaman

14

Seld 5 n yiseggasen segmi yeḥbes usenfar n usiweḍ n lgaz agaman seg Tala Ifassen ɣer tɣiwant n Ayt Smaɛel, a-t-an berrḥent-d kra n teɣbula s userreḥ i tedrimt ara d-yawin akemmel n lecɣal. Ilaq ad d-nini d akken ulamma aẓeṭṭa n ubḍaw yella yettmagga deg wakuden iɛeddan di kra n tuddar n tɣiwant, maca asenfar n tiwin n uqadus ara d-yasen ɣer Uswel, seg Tala n Yifassen, yella yewḥel. Iqeddicen-nni dɣa i yellan ttmaggan deg yiberdan, gan-d ayendin d uguren i yimezdaɣ. Tikwal, ttilin d amihi fell-asen, abeɛda arrac imecṭaḥ i izemren ad ɣlin, seg tikkelt ɣer tayeḍ, deg yiḍerfan yettwaɣzan.

Rnu-as attwiɣ n yiberdan i yesserfan nezzeh inehharen n yikerrusen. Ula d iqeddacen n termisin ur ttarran ara abrid amek i t-ttuɣ, mi ara kfun lecɣal-nsen. Maca tura, ad snuffsen yimezdaɣ xersum s yisalli n userreḥ n usenfar ara asen-ibeddlen kra di tɣara n tudert, ara asen-yekksen kra n tɛekmin i niqal ttidiren seg lgaz n tqerɛet. «Seld annect-nni d araǧu, yettwakkes dayen lqid ɣef usenfar-a n usiweḍ n lgaz i tɣiwant-nneɣ. Mazal ad aɣ-d-mlen amek ara tili tura akken ad nwali tirmisin deg unnar», i aɣ-d-yenna uselway n tɣiwant n Ayt Smaɛel, Mass Sadeq Rebbaɛi. Ad d-nesmekti d akken seg Sṭif i d-tewwi tɣiwant n Ayt Smaɛel, acku tezdi tilisa akked twilayt-a.

Dɣa, tuqqna ad d-tas ɣef teɣzi n wazal n 15 n yikilumitren akken ad tessečč ayen yettqaraben ɣer 3 000 n yixxamen. Kra n yiɣermanen ssarmen lemmer i d-yeḍra waya deg unebdu yezrin. «Lemmer ur sweḥlen ara asenfar-a ɣur-nneɣ iseggasen-a ineggura, tili tagrest-a nesɛedda-tt teḥma akken iwulem», i iwala yiwen n umezdaɣ.

M. K.