Accueil Tamazight Tella-d deg tegnatin yemgaraden akked tid iɛeddan

Lɛid tameqqrant

Tella-d deg tegnatin yemgaraden akked tid iɛeddan

22

Tella-d lɛid n useggas-a deg tegnatin i ixulfen leɛyudat n yiseggasen yezrin ladɣa deg tmurt n leqbayel.

Xas ulamma d ass n lferḥ d unecreḥ meɛna tafaska n useggas, tusa-d am wakken ẓẓayet ciṭ ɣef wulawen n yimdanen. «Tikkelt-a, mačči kan ur friḥeɣ s lɛid, meɛna ḥezzneɣ imi ilmeẓyen-nneɣ ha-ten-in deg lḥebs. Sɛeddan-tt mebla imawlan akked yimeddukkal», i d-yenna s usḥissef ameqqran yiwen yilemẓi. Tikti-agi, terza aṭas n yiqbayliyen ladɣa imawlan akked yimeddaukkal n wid d tid yellan akka tura deg lḥebs. Wid-nni rran ɣer lḥebs imi lḥan s wannay amaziɣ deg tmesbaniyin n umussun aɣerfan i d-yettilin yal ass n lǧemɛa akked wass n ttlata. Ayen ikemmlen lɣiḍ n yimdanen ɣef taluft-agi n wannay, d akken yal axxam n ccreɛ d amek yeḥkem.

«Amek deg Ɛennaba, serḥen-d i yiwen i ṭṭfen ɣef wannay, deg Cclef, ḥekkmen ɣef sin s sin wagguren n lḥebs melba aneḥbus, ma deg tmanaɣt, ha-ten-in deg unekruf ?», i yesseqsay yiwen umdan. Zyada ɣef taluft-agi n wannay, yella-d uneḥbus n yimdanen i wwin ɣef tikta-nsen, ɣef wakken i d-nnan yibugaṭuten-nsen. Aya akk, yerna-d d ugur-nniḍen ɣer tama n yisuturen n umussu aɣerfan i mazal ur nefri. Am wakken i d-yerna diɣ i wurrif n twaculin i iqublen lɛid tameqqrant n useggas-agi imi neẓẓfent texriḍen-nsent seg tazwara n unebdu: Bdu-tt-in seg lɛid tameẓyant, timeɣriwin n unebdu, imuras akked lɛid-agi tameqqrant, sya ar d-taweḍ, diɣ, tuɣalin ɣer uɣerbaz.

Meɛna ugur ameqqran neɣ tawaɣit tameqqrant, tḥuza ixeddamen n tkebbaniyin i yettwaḥebsen neɣ i yesneqqsen lxedma imi imɛelmen-nsen wwin-ten ɣer lḥebs. Xas ulamma yella-d umeslay ɣef tifrat sɣur lḥukuma, ussan-agi, acu kan ar tura ulac acu i d-ibanen deg unnar, neɣ deg tilawt. Akken yebɣu yili, lɛid tameggazt i yal yiwen.
Hocine Moula