Accueil Tamazight Tella-d taddart n At Ɛacur di ttiɛad

Tameɣra n uderyis

Tella-d taddart n At Ɛacur di ttiɛad

34

Mgaraden leqdicat swayes ttmagaren yimezdaɣ n tudrin tafsut. Akken kan ara yekcem meɣres, ad d-yeglu s yijeǧǧigen, ttcemmiren yimezdaɣ i yiɣallen akken ad mmagren tafsut s wafud d wazal tesɛa.

Aderyis d yiwen n wansay iɣef sseḥbibirent waṭas n tuddar. Ɣas yettwattu deg kra n temnaḍin, maca deg tiyaḍ mazal azal-is. D imɣi, d tuččit, d ansay i yis-s ttmagaren tafsut, sfugulen-t deg yal axxam. Taddart n At Ɛacur i d-yezgan deg udewwar n Ikeǧǧan, aɣir n Bgayet, tella-d di ttiɛad. Deg wayen iɛeddan, yettwasfugel deg yixxamen, yal wa s yimensi weḥd-s. Maca deg yilindi, tɛezzem tesqamut n taddart akken ad d-yettili usfugel n uderyis s tmeɣra di taddart amzun d tafaska tamecṭuḥt ara d-yettezzin yal aseggas. Ihi, taẓrigt tamezwarut, teḍra-d ass n, 16 meɣres 2018, u tezri deg tegnatin igerrzen. Ɣef waya i ɣetsen wat taddart, meẓẓi meqqer, akken ad d-tettlal yal aseggas teẓrigt tamaynut, d ayen i ten-yeǧǧan ad d-ssudsen ass n, 30 deg meɣres 2019, taẓrigt tis snat s yiwen wahil d amerkanti. Yebda wahil ass n lǧemɛa 29 meɣres s lxedma n tejmaɛt i usizdeg n taddart, ma deg yiḍ, d aheggi n seksu s uderyis d yisufar-is sɣur tulawin n taddart almi d qrib lefjer. Taṣebḥit n wass, msegrawen-d yakk yimezdaɣ ɣer tejmaɛt s yilmeẓyen, irgazen, imɣaren d tulawin I wakken ad bdun leqdic d uheggi. Rran-d akk i teɣri, s wid izedɣen deg taddart, s wid n berra, ama di temdint n Bgayet, Lezzayer tamanaɣt neɣ anda-nniḍen, ula d tiḥdayin izewǧen ɣer berra, llant-d di ttiɛad s twaculin-nsent, dɣa temlal tasa d way turew. Yebda wahil s ccna d tezlatin tiqburin n teqbaylit n Sliman Azem, Lḥesnawi, ideflawen, Meɛtub d wiyaḍ i yettweṣṣin ɣer tegmat. Syin d timsikent n yidlisen n tmaziɣt i win yebɣan ad iɣer neɣ ad yaɣ adlis s ubuddu. Ttnaṣfa n wass, mlalaen-d akken llan ɣer tejmaɛt, imi d lawan n uɛerruḍ d wučči (n usafar iɣef d-mlalen ass-a). Ɣef 13h00, nwala-d amazrar (spectacle) n Karaté sɣur inaddalen imecṭuḥen ixeddmen addal n Karaté, umbeɛd d afraq n tẓidanin i yimecṭaḥ merra i d-yernan tahuski i taddart. Ɣef 14h00, yella-d wawal n uselway n tddukkla n taddart d kra n yiɛeggalen i d-yessegzan anamek n wawal aderyis d wansa i d-yekka, d wamek i t-xeddmen. Tameddit Ɣef 15h00, d nnuba n warrazen i tullas, imi seg 17 n ssna d tasawent, wwint akk isefka i lmend n wass agraɣlan n tmeṭṭut i yezrin ussan iɛeddan, d ayen i tent-yesferḥen s waṭas s tejmilt-a i asent-yuɣalen. Yekfa wass adelsan ansayan s lqahwa d tẓidanin i yal yiwen, uqbel ad msefraqen s tumert, deg usirem d uraǧu n teẓrigt tis kraḍet ara d-yezzin di lxir.

Nnan-d ɣef waya

Nesteqsa aselway n tddukkla n taddart, Mass Smaɛil.A ɣef wamek iɛedda wass n tesfugla, a-t-aya wayen i d-yenna “Di tazwara, yewwi-d ad nesnemmer yakk imezdaɣ n taddart yekkin di leqdic-agi, yal yiwen amek yezmer. Numer ayendin acku d ass iɛeddan deg tegnatin igerrzen, rnu ɣer waya d abaɣur i yimecṭaḥ i d-yettnekkaren ad ḍefren deg ubrid n lejdud. Nessaram yal taẓrigt ara d-yernun, ad tif tin yezrin”. I usmekti, taddart n At Ɛacur, tettabaɛ taɣiwant n Tifra, asun n Sidi Ɛic, lɛerc-is d At Mensur. Tusa-d s 700 n lmitrat nnig n yilel, d taddart akk tamecṭuḥt deg udewwar-a, dɣa ahat d ayen i yeǧǧan imezdaɣ-is ad mwatan s sshala ɣef yal taɣawsa yellan, ladɣa ayen yerzan lecɣal n taddart, s leqdic n usegmu d tallelt gar yimdanen i uḥareb d usnerni n yidles. D leqdic d twizi i d-yettilin di taddart, i ten-yeǧǧan ad kkin deg temsizzelt n taddart zeddigen i d-yesuddes Useqqamu aɣerfan n twilayt n Bgayet deg teẓrigt-is tamezwarut ara d-yilin deg wussan i d-iteddun. D asirem ad d-ḥellin amḍiq gar yimezwura, u daɣen d tagnit akken ad yeṭṭuqet leqdic ara yerren taddart-nsen twenneɛ ugar n wakken tella.

Khaled Achoui