Accueil Tamazight Tella-d temlilit n yiselmaden ...

Wehran

Tella-d temlilit n yiselmaden n tmaziɣt d umaswaḍ-nsen

73

Seld mi yekfa amahil-is umaswaḍ n tmaziɣt Mass Abdellah Arkoub deg twilayt n Tlemsan, yerza ɣer yiselmaden n Wehran tazwara n ddurt iɛeddan. Amahil i t-yewwin ɣer Wehran yemgarad gar usenṣeb n yiwet n tselmadt d tirza n tesweḍt ɣer yiselmaden-nniḍen akked wass n usileɣ i yiselmaden merra n tmaziɣt. Yebda Mass Ɛerqub leqdic-is ass-nni n acer, 21 yebrir, s tirza ɣer uɣerbaz amenzu Ɛizi Ben Yebqa deg tama n Beṭṭiwa anida i yessenṣeb taselmadt Massa Ǧ. Smaɛil i yesɣaren yiwet n tnelmadt kan, maca deg uskasi i d-yellan ar taggara gar-as d tnemhalt n uɣerbaz d kra n yimaswaḍen, yenna dakken ilaq ad d-afen tifrat i wugur n tdersi n yinelmaden yeqqaren tamaziɣt deg tneɣriyin, s umeslay d usebɣes n yinelmaden-a, acku ur d-teqqim ara kan deg uselmad, imi aneggaru-a, axeddim-is yettili deg tesmilt s usenked n temsirin. Deg wass wis sin, arim 22 yebrir, iga umaswaḍ tirza n tesweḍt ɣer sin n yiɣerbazen yellan deg tlemmast n temdint.

Taṣebḥit, yella deg uɣerbaz Ben Tacfin anida i iwala tamsirt n tegnit n tmenna i d-tessenɛet tselmadt ɣef useḥbiber ɣef tdawsa, ma d tameddit yeḥḍer i temsirt deg uɣerbaz El Imam El Hewwari i d-yewwi uselmad ɣef tneqqist n wuccen d yizimer. Mass Arkoub yumer aṭas s uswir n yinelmaden, acku rran lwelha-nsen akken ilaq ɣer temsirin u ddan d uṣenfar. Ar taggara, yella-d uskasi gar umaswaḍ d yal aselmad, anida i asen-yefka kra n yiwellihen d lixṣaṣ i iwala ilaq ad yettwixdem, uqbel ad asen-yefk tazmilt ɣef tirza-a.

Ass n arim, d ass n usileɣ deg tesnawit Cellali Xadiǧa deg tama n El Ḥasi, ṣṣbeḥ yewwi-d Mass Arkoub awal ɣef tarrayin iwulmen i uselmed n tmaziɣt ɣer yiɛerbawalen, yefka iwellihen i yiselmaden amek ara ssuddsen asenfar d tgezmin s yiman-nsen war ma smersen adlis aɣurbiz s waṭas, imi d allal ẓẓayen ɣef uswir n yinelmaden-a. Mbeɛd imekli, uɣalen-d ɣer umahil seg 13h ɣer 15h30, msebḍan yiselmaden ɣef sin n yigrawen, gan amedya n usenfar d tegzemt n waddal n ddabex uḍar s yakk irmuden.

Yumer aṭas umaswaḍ s uswir d unadi xeddmen yiselmaden, ama deg Wehran neɣ di Tlemsan, acku abaɣur d uswir d umḍan n yinelmaden simmal yettnernay, ayagi yakk ahat yezmer ad aɣ-d-yessebgen belli aselmed n tmaziɣt a-t-an deg ubrid iwatan. D awal-a i swayes i d-yessegra Mass Abdellah mbeɛd mi t-nesteqsa “La teddun lecɣal akken ilaq, ma nwala dakken inelmaden sɛan lebɣi ameqqran i ulmad, ɣas tadra-nsen mačči d leqbayel merra. Yella daɣen kra n lixṣaṣ yerzan asileɣ imi iselmaden d imaynuten, acu kan s temliliyin am ti simmal yettgerriz waddad”.

Khaled Achoui