Agraw n Ev-play s lemɛawna n Massaesyle, Pacte immo akked Berbère TV, heggan-d yiwet n temsizzelt i yilmeẓyen deg ussan-agi n ukman. Uznen yilmeẓyen tividyutin ɣer usebter n Ev-play anda i d-cennun, syin akkin, ad ttwasuzer deg usebter n Ugraw akked usebter n Berbère TV. Dagi ara fernen yimsefliden tin i asen iɛejben. Ma nerra ddhen-nneɣ ɣer uswir n yilmeẓyen-agi, ad naf aṭas deg-sen i icennun akken iwata, maca ulac kan anda ara d-sbeggnen taẓuri-nsen. Anect-agi, d ayen yesḥissifen. Am wakka dɣa, d taswiɛt ara faṛsen yilmeẓyen-a s temsizzelt-agi u d tagnit akken ad tent-id-tesebggen i wakken ad snernin tamussni-nsen deg tẓuri i kesben. Ɣef leqdic-a s umata, nesteqsa imḍebber n Uragw, Hakim Belout ɣef wamek i d-tusa tekti, acḥal n yimekkiyen akked yiswi n temsizzelt. Ha-t-an wacu i d-yenna : ‘’ Tusa-d tekti di teswiɛt n ukman. Nebɣa ad nexdem kra i yilmeẓyen akken ad sedhun iman-nsen deg ussan-agi. Syin akkin, nberreḥ-d s usenfar deg yimiḍan-nneɣ n Facebook. Wwḍent-aneɣ-d 150 n tvidyutin. Syin akkin, tella teseqqamut i ixeddmen deg taɣult-agi n lmuziga, xtaren-d azal n 20 n tvidyutin ara d nesuzer deg yimiḍan n facebook i wakken ad d-ufraren 03 n yilmeẓyen ara iɛeddin ɣer uḥric aneggaru akken ad d-yeqqim kan yiwen, iwumi ara nessekles tisfifin. Am wakken daɣen ara yili win i d-yufraren deg tezrigt i d-iteddun n Tfaska n wuḍan n Tegzirt . Taggara n temsizzelt, ad tili deg tilivizyu, ad ilin aṭas n iwudam imeqqranen n tezlit taqbaylit. Di taggara n teẓrigt n tikkelt-agi, ad nennejmeɛ, syin ad nwali d acu ara nexdem sya d tasawent. S wakka, nebɣa ad asen-nefk tagnit i yilmeẓyen-agi akken ad d-tban taɣuct-nsen u ad neǧren azekka-nsen deg ccna . Ma ɣef wuḍan n Tegzirt, ad d-iniɣ, di teswiɛt-agi ur nezmir ara ad neṭṭef rray, acku liḥala urɛed terkid. Ur nezri ara ma yella aṭṭan ad iruḥ neɣ ad iḍul. Ɣef wanect-agi i werɛad i d-iban ma yella ad tili tezrigt neɣ xaṭi.
Souhila Yamani