Accueil Tamazight Tella-d Tezrigt tis 6 deg tegnatin igerrzen

Ṛreḥba n udlis n Bujimaɛ

Tella-d Tezrigt tis 6 deg tegnatin igerrzen

75
Exif_JPEG_420

Mbaɛ mi tɣab sin n yiseggasen-aya ɣef ssebba n waṭan Covid-19, ha-tt-an tuɣal-d Ṛreḥaba n udlis n Bujimaɛ s Tezrigt-is tis 6, ussan 20, 21 d 22 deg maggu yezrin. Aṭas n yimura, imsaragen d tezrigin i iḥeḍren asehar-agi anda i d-rzan wayen din n lɣaci seg yal tama, ama seg lwilaya n Tizi Uzzu neɣ seg lwilayat-nniḍen, yecban Bgayet, Tubiret, Bumerdas, Lezzayer tamanaɣt, Sṭif, Wehra…atg. Deg temlilit-a, llan isaragen, asenzi s ubuddu, temsikniyin d wayen-nniḍen. Ma ɣef Ṛreḥba s timmad-is, nnan-d :  Madjid Oumniya (amaru) : ‘’tazrigt-agi, d ayen yessefraḥen mliḥ mliḥ, a lukan yal taɣiwant ad tesɛu tazrigt am tagi.

Ad ilint aṭas deg useggas, axater adlis yettnuzu s leɛqel. Mi ara taruḍ adlis u ad yeqqim sin neɣ tlata n yiseggasen i wakken ad yenz kra seg-s, yessefcal bab-is. Syin, aṭas ur nezmir ara ad arun. Llan ɛad wid ifecclen. M d Yahia Bellil (imeɣri seg Bgayet), yenna : ‘’Ass-a, rziɣ ɣer rreḥba n udlis n Bujimaɛ. Ufiɣ dinna tagnit teεmer. Muggreɣ imeddukkal n umennuɣ, imura i ssneɣ d wid ur ssineɣ, uɣeɣ-d idliden-nsen s lferḥ. Rrehba-a, txulef tiyaḍ: ggten yimzuṛen, yerna ulac tili n udabu. D timlilit n uɣref i tɣuri. Sḥassfeɣ imi ur n-qqimeɣ ara ɣer usarag n umeddakkel-iw Remḍan Lasheb. Abrid n tuɣalin ɣezzif yerna ilaq ad d-kecmeɣ.

Mazal lxir ar zzat! Ma d tamuɣli n Yahia Yanes (Tizrigin Planétaire) d ta : tazrigt-agi d tis 6, mačči am tid iɛeddan. Tid yezrin, ttilint-d deg waggur n yebrir anda mazal lɣaci qqaren, yettili umbiwel. Ma d tura seg Covid-19 ar da, ixus lbiɛ.

H.Moula