Accueil Tamazight Tella-d tuɣalin n yinelmaden deg uɣerbaz n tmaziɣt Inas

Kanada

Tella-d tuɣalin n yinelmaden deg uɣerbaz n tmaziɣt Inas

37

Deg tmurt n Kanada, llan sin n yiɣerbazen uzzigen yesselmaden tutlayt n tmaziɣt aṭas-aya. Yiwen seg yiɣerbazen-a isem-is Inas. Yeldin tiwwura-s i yinelmaden iqbayliyen i d-yettnekkaren deg tmurt-a taɣribt. 10 n yiseggasen ɣer deffir segmi bdant temsirin n tmaziɣt deg-s. Ttjerriden yimawlan tarwa-nsen ɣer uɣerbaz-a akken ur sen-tettruḥu ara tmeslayt seg yilsawen. Dɣa ass n, sed 7 cutember 2019, i d-tella temsirt tamezwarut n useggas-a aɣurbiz 2019 / 2020 deg uɣerbaz uzzig Inas, mbeɛd sin n yimalasen n tiggezt n wid iran ad kemmlen almud-nsen neɣ ad kecmen i tikkelt tamezwarut s aɣerbaz-a yesselmaden tutlayt n tyemmat.

Kfan wid ixeddmen deg tedbelt, ssulin igrawen, gan-d ahil n temsirin ara d-yettilin am yiseggasen yezrin, ussan n sed seg 10h ar 12h. Ma ɣef lexlas, nnan yinedbalen belli ma llan sin n yinelmaden seg yiwet n twacult, lexlas ad d-yili drus-it, ma yerna-d wis kraḍ, almud-ines ad d-yili baṭel, ɣas meqqer di leɛmer, acku yella yiwen n ugraw uzzig i yimeqqranen. I usmekti, yesfugge uɣerbaz Inas amulli-ines wis mraw deg waggur n yunyu iɛeddan, deg tegnatin n tumert d tegmat i d-yessemliliyen inelmaden d yimawlan-nsen d wid iqeddcen deg uɣerbaz. Yal taggara n useggas, beṭṭun akud-nsen s wass n tmeɣra n ccna, amezgun, tamedyazt d ccḍeḥ. Akken daɣen seg tikkelt ɣer tayeḍ, rezzun-d yimeqqranen n ccna n teqbaylit yecban Kamal Ḥemmadi, L. Ayt Mengellat, Z. Mulud d wiyaḍ akken ad ccnun gar yiferraǧ yeqqaren deg uɣerbaz Inas i d-yezgan deg temdint n Montréal deg tmurt n Kanada anida gten yimezdaɣ iqbayliyen.

Taggara-a, aɣerbaz Inas yessunẓa tamkerḍit-ines, deg wass n 20 yebrir iɛeddan, d tamkerḍit ideg ara naf tiwinas n yidlisen, timseḍsa d yisura yemgaraden, ama i yimeqqranen neɣ i warrac, i win yebɣan ad yerzu ɣer umayel n temkerḍit d wa, www.tamkardit.ecoleinas.org. Yeggra-d kan ad nessirem afud igerrzen i yiɛeggalen i iqeddcen deg uɣerbaz-a, gar-asen iselmaden i d-ikesben tirmit deg yiseggasen-a n uselmed, akken daɣen i nessaram ad d-ḍefrent tmura-nniḍen ɣer leqdic-a d umedya-a yelhan i iga uɣerbaz uzzig Inas i usnerni d uḥareb ɣef tutlayt n tmaziɣt d yidles-is, ad d-tettwakkes seg waccaren n tatut.

Kh. A.