Accueil Tamazight Temḍel ass-nni n larebɛa yezrin

Taẓuri Tamettant n tcennayt Djamila

Temḍel ass-nni n larebɛa yezrin

41

Teǧǧel i tikkelt-nniḍen tezlit taqbaylit imi i tt-teǧǧa yiwet gar tlawin yefnan tudert-is i ccna ɣef tmeṭṭut taqbaylit. Tacennayt tazzayrit n tenfalit taqbaylit, Ǧamila, tewweḍ leɛfu Rebbi, ass-nni n ttlata deg Lezzayer Tamanaɣt, di leɛmer-is 89 n yiseggasen, mbeɛd acḥal n yiseggasen n waṭṭan. Tella-d temḍelt-is ass-nni n larebɛa tameddit n wass, deg tmeqbert n Dili Brahim, deg Lezzayer Tamaneɣt. Ǧamila, s yisem-is aḥeqqani Lǧuher Bacan, tlul ass n, 2 Mayyu 1930 deg yiɣrem n Ayt Buhini, taɣiwant n Yiɛeẓẓugen di lwilaya n Tizi Uzzu.

D tagujilt s baba-s, segmi tesɛa 12 n yiseggasen, dɣa d netta i d-ixeddmen ɣef ayetma-s d yessetma-s. Asmi tesɛa 16 n yiseggasen di leɛmer-is, tessekcem-itt massa Lafage ɣer rradyu tis snat, anida tettekki deg ddeqs n tedwilin. Syin akkin, tebda-d amecwar-ines aẓuran deg 1951 d tamekfaḍut (animatrice) deg Terga Tis Snat n ṛṛadyu, sakkin d tacennayt. Seg 1953 ay tebda tettaru iḍrisen n tezlatin-ines nettat s timmad-ines, yernu teqqel mechuṛet s tezlatin am «Abeḥri», « Siweḍ-as sslam » i tga d izen i yiɣriben yettidiren deg lɣerba.

« Ay aɛessas n lǧameɛ » d « Rnu-as aman a lxali », « Ifut lḥal », « A zzher-iw akka i yebɣa » d waṭas n tezlatin-nniḍen. Tin ɣur-s, terna ɣer talilt (chorale) n tlawin, iwumi semman « Urar n lxalat » n rradyu Tis Snat, ideg tettekka daɣ Crifa. Amecwar-is deg ssinima d tiliẓri, yebda-d deg 1962, anda i turar deg yimazraren d yisura. Turar deg usaru « Le colonel Si Belaid », « Le Bus des rêves » n Musṭafa Tirzawi.

Tettekki diɣ deg usaru « Le vent des Aurès » neɣ (Aḍu n Uwras) n umsuffeɣ Lexḍar Hamina d « Les hors la loi » neɣ (Wid Yeffɣen i Usaḍuf) n umsuffeɣ Tufiq Fares ɣer tama n yisura n Sid Ali Mazif, gar-asen « Leila et les autres » neɣ (Layla d Tiyaḍ). Am wakken daɣen i tettekki deg usaru amenzu n teqbaylit « Tawrirt yettwattun » n umsuffeɣ Bugermuḥ. Tettuneḥsab Ǧamila, d yiwet gar tgejda n ccna teqbaylit, imi seg tlawin timenza yerẓan asalu n ccna. Tewwet ɣef yizefan d tlelli n tmeṭṭut deg tmetti. Di taggara, ad d-nini : «Xas teǧǧa-aɣ, teǧǧa-aɣ-d». Sgunfu di talwit a tiɣri n tmeṭṭut taqbaylit.

Adaoun Abdelghani