Accueil Tamazight Temdel tiwwura-as teẓrigt tis 17

Ayt Smaɛel Tafaska n tmedyazt

Temdel tiwwura-as teẓrigt tis 17

93

Ass n sed 30 di meɣres i tettwaseqqef teẓrigt tis 17 n tfaska taɣelnawt n tmedyazt tamaziɣt, i d-thegga tddukkla tadelsant. Adrar n Fad, d tajmilt i tmarut Kaysa Xalifi. Ɣef teɣzi n kraḍ n wussan, yemmug wahil deg Uxxam n yilemẓiyen Mulud At Mɛemmer, s uḥḍar n yimedyazen, imura, iselmaden, imeɣnasen d yinebgawen.

Dɣa, ass n 28 meɣres, seld taldayt n tefsarin d ujerred n yimekkiyen, tella-d tullya tunsibt n tfaska s wawalen n uselway n tddukkla tadelsant Adrar n Fad, n uselway n tɣiwant n Ayt Smaɛel d uletma-s n tmerḥumt Kaysa Xalifi. Am wakken i yefka umedyaz Lxeyyer Brahimi taɣawsa n tẓuri i twacult n Kaysa, d tajmilt sɣur-s i yelli-s n Udrar n Fad. Akken ad yili imir-n uɛeddi ɣer usiwel n tullisin sdat uzayez.

Kra n uswiɛ aredqal, kecmen yimedyazen di tegnit n tmenna n yisefra-nsen i lmend n umsizwer n tmedyazt. D ayen ikemmlen armi d iḍ n wass-nni amezwaru. Azekka-nni d sem, yebda tanezzayt wahil n wass n tezrawt i d-yettwaheggan ɣef yiqeddicen iseklanen n Kaysa. D rreḥba i d-sneɛten yiselmaden n tesdawiyin n Bgayet d Tizi, am Mass Ɛellawa Rabḥi, Mass Muḥend Akli Salḥi, Massa Wataḥ Linda, Mass Meqran Cixi akked Mass Salim Ayad. Aṭas i d-yellan dɣa d awal ɣef wungal Iḥulfan, ɣef tulmisin-is, tibaɣurin-is d wayen akk tesseqdec deg-s lal-is.

Seg tzeggant n wass-n, ddan yiɛeggalen n tddukkla d kra n yimedyazen ɣer Bgayet, i tikli taɣerfant i d-yettuɣalen yal tameddit n wass n sem. Dɣa, di tuɣalin i Udrar n Fad, ala timenna n yisefra i d-yellan deg yiḍ. Ass n sed, d asarag n Mass Muḥend Belqasem, ɣef usideg aqbayli, i d-ijebden awellih sdat uzayez. Ugar n usefti n umeslay ɣef umaḍal-a n usideg, ur yettu umsarag ad yerr tajmilt i temsidegt Kaysa Xalifi i yellan gar tlawin timezwura i yernan i terbaɛt n yimsidag.

Deg yiwet n ṭṭabla, tewwi-d Massa Fahima Seddiri awal ɣef Kaysa Xalifi s yisem n teẓrigin Ccix Muḥend Ulḥusin, am wakken i d-yenna awal-is yinebgi n yiseɣ, Mass Nurdin Ayt Sliman. Mettwal akud-nni dɣa i yettunefk warraz Kaysa Xalifi n usideg i Mass Muḥend Belqasem, s yifassen n lmir n Ayt Smaɛel Mass Sadeq Rebbaɛi. Seld imekli, isenɛet-d Mass Ḥend Seɛdi asarag-is ɣef tidmi n Lmulud At Mɛemmer, akken ad t-id-yeḍfer syin akkin uskasi s wazal-is.

Di tfuggla n useqqef, ttunefken tazwara warrazen n umsizwer n tullisin i Massen Saleḥ Luni, Lyes Belɛidi akked Saḥli Walid. Syinna, ttunefken kra n yisefkan i twacult n Kaysa sɣur yimedyazen Mbarek Gamar d Idiri Nura, i d-iheggan tajmilt i Kaysa. Imir-nni, d aɛeddi ɣer tikci n warrazen n umsizwer n yisefra ideg i d-yufrar d amezwaru yilemẓi Ǧilali Ḥaduc. Arraz wis sin tewwi-t tmedyazt Buciba Fatiḥa, ma d wis kraḍ isaḥ-d i Mass Qeddur Rabeḥ.

Ɣef warrazen-nniḍen, yettunefk warraz Kaysa Xalifi n tmeṭṭut, i ddment teẓrigin Ccix Muḥend Ulḥusin, i Massa Idiri Nura. Win n yilemẓi yerra ɣur Badis Meḥmudi, win n yimezgi yeggra-d gar yifassen n Fellag Saɛid, win n umɣar yuɣal i Mass Zinet Ɛemmar, ma d win n tantala, d Lyes Aɣugali i t-yewwin.

M. K.