D Rebbi i tt-iselken. D wagi i d inzi i d-yettuɣalen yal mi ara teḍru twaɣit, ad d-yili leslak seg-s di ddqiqa taneggarut. D akka i teḍra d yiwet n twacult n kraḍ n yiɛeggalen i qrib truḥ d asfel tameddit n aram iɛeddan deg uzaduɣ iwumi qqaren Azaduɣ n Aḥmed Zabana deg yiɣrem n El Yasmin deg tama n usamar n Wehran. Ssebba n twaɣit, d aglawal i ǧǧan icudd ɣer teprizt deg yiwet n texxamt, ma d nutni tuɣ-iten ṭṭsen deg texxamt-nniḍen. Ur faqen armi kan walan abbu meqqren yetteffeɣ-d seg texxamt-nni, d times annect-ila-tt, tzehher s daxel. Tawaɣit d akken mi ɛerḍen ad d-rewlen ɣer berra seg tewwurt n uxxam, ur zmiren ara, acku yuɣ lḥal tawwurt-nni temdel-d seg berra sɣur mmi-tsen yellan taswiɛt-nni di lqahwa. Iḥun Rebbi faqen kra seg yimezdaɣ n din s wabbu-nni berriken mi d-itteffeɣ seg yiwen ṭṭaq, uzzlen rẓan tawwurt-nni s kra n wallalen u ssuffɣen-ten-id ɣer berra, seld mi rɣant snat n texxamin s lekmal, temneɛ kan tis tlata-nni ideg qqimen niqal. Seld mi qrib ad tefru tedyant, a-ten-aya ikumya d ufurgut n uḥuddu aɣarim, wwḍen-d, u ɣas akken mačči deg lawan ilaqen i d-usan, maca wwin tameṭṭut-nni yuɣalen merra d taberkant seg ddexxan ɣer sbiṭar, ad setkelfen s waddad-ines.
Khaled Achoui