Accueil Tamazight Terwi deg uxxam n FFS

Terwi deg uxxam n FFS

48

Aṭas-a segmi teddebdeb ddeɛwa ɣur ukabar n Tirni n Yiɣallen Iddukklen (FFS), maca yerna yimɣur uɣilif ussan-a daxel uxxam armi, mačči kan yal aɛeggal d axsim n gma-s-nniḍen, maca llan sin n yimarayen imatuyen, Ḥakim Belleḥsel si tama d Mhenni Ḥadadu si tayeḍ. Yezga umseḍlem di tlemmast n ukabar, imi d-tessufeɣ tenmehla n ukabar ulɣu ideg i d-tewwet ɣef yiwet n terbaɛt deg ukabar-a iɣef i d-tenna sbaddaden-d iman-nsen d imasayen n ukabar s ukemmel deg tiɣriwin-nsen berra i tamiwin tunsibin. Tazwara yella-d useḥbes ɣef kra n yiɛeggalen n Useqqamu aɣerfan aɣelnaw, n Tizi Uzzu d Bgayet, mi d-heggan, ɣef rray n tenmehla n ukabar di Lezzayer, inejmuɛen d uffiren berra i usaḍuf-nsen d wahil amezwaru n ukabar. Dɣa, ass n sem, 29 meɣres, sin n yiseqquma ifidiraliyen i yemmuggen deg Tizi Uzzu d Bgayet war ma ḥeḍren yimasayen idiganen unsiben n ukabar, neɣ war ma yella yakan umsegraw-a deg wahil. Akka i teḍra ula tikkelt iɛeddan mi d-suddsen yimeɣnasen aseqqamu afidirali di Lezzayer tamaneɣt, ur tebɣi ara tenmehla taɣelnawt n ukabar. Syin, d taduli tasertant i d-tenna tenmehla tekkes-itt ɣef yiwamniyen acku ugin ad d-ṭṭixren seg useqqamu aɣelnaw d usinat. Sɣur tama-nniḍen, caḍen yimeɣnasen i yekkaten deg tenmehla imi, ɣef tmuɣli-nsen, teffeɣ asaḍuf n ukabar d yiswan iɣef yettnaɣ, am wakken ur tquder Ḥusin Ayt Ḥmed i t-id-yesnulfan. Ula d tafelwit n umjahed-a, tettwakkes sɣur tenmehla seg uxxam aɣelnaw n ukabar, ɣef wakken i d-tewwi teɣbalut-nneɣ. Seld amcubbek-a, ufan iman-nsen yimeɣnasen ilaq ad d-snulfun isebtar d imaynuten di internet akken ad meslayen i ugdud d wid i yeṭṭafaren akabar, imi adeg internet unsib n ukabar aql-it gar yifassen n tenmehla. Ad d-nesmekti belli wid yellan mgal tanmehla, ssuturen ad ɛeddin ɣer Uswir aɣelnaw ideg ara frun ugur. Aṭas i yettmesteqsayen ɣef ssebba i yeǧǧan times tneddeh trennu deg ukabar-a armi ur yerkid maḍi maḍi taggara-a. Abeɛda di tallit-a gedged ideg ula d tamurt teddebdeb s umussu aɣerfan i issuturen abeddel.
M. K.