Accueil Tamazight Terwi tebberwi gar umɣar d ilemẓi

Mazal ttkemmilent tmesbaniyin deg Lezzayer

Terwi tebberwi gar umɣar d ilemẓi

128

Mazal ttkemmilent tmesbaniyin mgal adabu, yal lǧemɛa, deg yal tamnaḍt n tmurt n Lezzayer. Meẓẓyit, meɛna d ucmiḥen, duḥricen. Ɣran deg uɣerbaz izelgen, meɛna wwin-d timussniwin anda-nniḍen. Ssaramen i warraw-nsen tudert igerrzen, xas nutni mazal ur zwiǧen. Kkren-d s zzaɛf n yibabaten-nsen akked d tissas n tyemmatin-nsen (akken i d-qqaren) i wakken ad idiren deg talwit, deg yiseɣ, deg tugdud, deg unecraḥ d ccḍeḥ am nutni am yilmeẓyen i ten-yecban deg ddunit. Bɣan Lezzayer tazzayrit anda ara yidir yal yiwen s yiḥulfan-is, s yixemmimen-is melba ma zzuɣren-t, nehhren-t neɣ deggren-t. Wigi, d ilmeẓyen i d-itteffɣen yal lǧemɛa s abrid, degTizi Uzzu, i wakken ad suɣen ɣef yizerfan-nsen, ɣer tama n ugdud azzayri. D nutni i yefkan isem i ugraw-nsen Le Carré, s yiman-nsen. Teddun deg yiwen ubrid xas ulamma mxalafen deg tiktiwin-nsen akked tmeslayin-nsen: Wa yettmeslay s teqbaylit, wa s dderdja tazzayrit, wayeḍ s trumit neɣ taglizzit. Xas ur ssinen ara mliḥ tasertit, meɛna ssnen amek ara beɛden i txidas d tkerkas. Ttmuddun tameẓẓuɣt i wayen i d-qqaren yimeqqranen, ssemḥasen i yiwellihen-nsen, meɛna deg taggara, ttaddamen rray-nsen nutni. Ssuturen Lezzayer n yal yiwet, n yal yiwen. Lezzayer tagdudant, yettsaɛafen, mačči tin yessekrafen. Ẓran ansi i d-kkan, refden asafu n yimezwura-nsen, acu kan bɣan ad ilin d nutni, ad zuxxen s yiman-nsen, mačči kan s yimenza-nsen. Ẓran sani i teddun, iban ubrid-nsen imi bdan la as-ttruẓun asalu. Xas yessawen, meɛna yessawaḍ. Akken qqaren “Win iteddun ɣer tidet, yessawaḍ”. Ihi, nutni iban-asen ubrid. “Imezwura, iban-asen, ineggura, iban-asen, aḥlil ay ilemmasen”.
Hocine Moula