S zyada ɣef yiselmaden n tmaziɣt yettmahilen deg twilayt n Wehran, yella-d usiwel i snat n tselmadin timaynutin i yellan deg wumuɣ n uraǧu seg wid yesɛaddan timsizzelt n unebdu n 2018, maca ur d-ddin ara lawan-nni. Tura mi tesra tenmehla n usedwel i sin n yidgan imaynuten, rnant-d tselmadin-a ɣer wumuɣ n yiselmaden yellan yakan deg twilayt-a. S wakka ad yaweḍ umḍan n yiselmaden n tmaziɣt di tama-a ɣer 11. Yettili-d ɣef lmendad-nsen yiwen n umaswaḍ i d-irezzun tikkelt ar snat i useggas i tigin n yisilɣen d usenṣeb d ferru n kra n wuguren i ttemlilin deg lxedma-nsen.
Netseqsa yiwet n tselmadt yesselmaden deg uɣerbaz amenzu, tenna-d “Amḍan-a drus-it maḍi, ma neẓra belli tamdint n Wehran, qrib azgen n yimezdaɣ-is d Leqbayel, nebɣa ad yali umḍan n yiselmaden dagi, maca seg tama-nniḍen, ilaq ur d-ttemlilin ara uguren am yal aseggas”.
Dɣa mi d-tebder tselmadt-a awal n wuguren, ad aɣ-teǧǧ ad d-nini am tannumi, yal tazwara n useggas, ttebdaden-d yinemhalen n yiɣerbazen d aɛewwiq mgal iselmaden n tmaziɣt, gar yiɛewwiqen-a, ad d-nebder tasebḍut n wakud ur nelhi ara i ttakken i yiselmaden (ttaččaren s tmaziɣt ilmawen), ur ttilin ara yinemhalen-a ɣef lmendad n yinelmaden akken ad bɣun ad ɣren tamaziɣt, ur d-ttawin ara idlisen di lawan… atg. Iselmaden seg tama-nsen, ttruḥun ɣer tenmehla n usedwel i ucetki d tifin n tifrat, maca ula d widak ttmagaren-ten-id s tesmeḍ, ɣef uqerruy-nsen anemhal n usedwel Mass Arezqi Slimani seg temnaḍt n Buɣni. Ar taggara, nessaram afud igerrzen d tebɣest i yiselmaden n tmaziɣt, ladɣa i wid yesselmaden berra n tmurt n Leqbayel. Ad ilin d amnir, d igensasen n tutlayt-a, akken ad tt-sḥemmlen i wid werɛad tt-iḥemmlen.
Khaled Achoui