Am yal aseggas, ḍeṛṛunt aṭaṣ n txeṣṣaṛin di tegrest, ama d isehwa n yiberdan, aṭṭerdeq n tbutayin n lgaz, neɣ d axnaq n yimdanen s wayen i iteddun s yis-s. Amedya, d tin yeḍṛan di Xeṛṛaṭa, ass n 13 unbir yezrin. Taluft-a, tamentilt-is d lgaz, dɣa qrib i tegla s teṛwiḥin n 6 n yimdanen seg yiwet n twacult. Γef leḥsab n teɣbalut-nneɣ, tadyant-a, teḍṛa di temnaḍt n Yijermunen, taɣiwant n Xeṛṛaṭa. Ɣef 02: 00 n tnezzayt, yekker leεyaḍ gar yimεacren n twacult-a, seld mi slan s wayen yeḍṛan. Imir-n kan i ssawlen i yiqeddacen n Uḥuddu aɣarim. Ineggura-a leḥqen-d di lawan, dɣa ṣṣawḍen selken-ten-id seg lmut timḥettemt. I yisalli, deg wid i ixenqen llan kṛad n yirgazen, d kṛaḍ n tullas. Ma yella d leεmeṛ sεan seg 33 armi d 76 n yiseggasen.
Ad d-nesmekti d akken, ɣef leḥsab n yisallen i aɣ-d-yewwḍen, iεeggalen n twacult-a, ur ssensen ara lgaz uqbel ad gnen, nutni ur zrin ara belli llan yiteyyuten i yessuffuɣen. Daymi ur faqen ara, armi i d-ufan iman-nsen wa yeṣreε, wa yemlelli. Wwin-ten yiqeddacen n Uḥuddu aɣarim s uɣiwel ɣer sbiṭer n Xeṛṛata, anda i asen-xedmen ayen i ilaqen. Ma yella seg tama n tɣellist, ttweṣṣin yiqeddacen n Uḥuddu aɣarim iɣermanen ad ḥaddren iman-nsen, acku lgaz n umunuksid n kaṛbun, ur iṛeḥḥem ara. Ihi yewwi-d fell-asen ad ttaǧǧan tiṭwiqin i ubeḥri, ad snusun ayen akk i iteddun s lgaz deg uxxam uqbel taguni. Rnu i waya, yal yiwen yellan sdat yimseḥmu(chauffage), ma yella iwala times-is d tawṛaɣt, ad t-yessens, ad iwali d acu d aɣilif. Akken qqaṛen At zik aḥader yeɣleb aqader.
K. K.