Tgellu-d twaɣit n tmes s umihi i umaḍal s umata. D tawaɣit i d-yettawin lemḍerra i umdan daɣen, imi deg kra n tamiwin tkeččem ula ɣer tuddar, tessexsar kra ara taf sdat-s. Yal aseggas tḥeggeṣ tiẓegwa, isekla d yimɣan. Ma d ssebbat d tidak dima, ma mačči d timental n ugama, d amdan i yettilin deffir n twaɣit. D igiman n yigeṭṭaren i ireqqen yal anebdu, ur ikeffu ara dɣa alamma berrḥent-d tenmehliwin n uḥuddu aɣarim s yigmaḍ i d-tessegra, ad ggarent tiɣri i leɛqel d leḥder. Dɣa deg twilayt n Wehran, tefka-d, seg tama-s, Tenmehla n uḥuddu aɣarim leḥsab n tjumma i tesserɣ tmes deg unebdu-a s 121 igeṭṭaren, seg umenzu n yulyu 2019 armi d 8 cutamber 2019.
Tenna-d d akken ɣas meqqer wuṭṭun-a, maca ur d-glint ara s txeṣṣarin timeqqranin i izemren ad ḍurrent amdan, acku tuget n tmess i inetren, tella-d deg tẓegwa. Seg tama-s temmeslay-d Massa Ḥalima.Ḥ, timḍebbert n uḥareb, ɣef yimihiyen n tmes, tenna-d 121-agi n yigeṭṭaren, 48 deg-sen d tiẓegwa timeqqranen i yerɣan, 63 n yigeṭtaren deg yimukan ur nelli d tiẓegwa, yexlan seg yimezdaɣ. Terna tenna-d belli “ma nesserwes amḍan-a ɣer win n yilindi, ad t-naf yuli mliḥ aseggas-a, imi ilindi tenker tmes 13 n tikkal kan, tegla s 12 n yigeṭṭaren, ma d timental ur banent ara”. Tiɣiwanin yenneḍruran s waṭas i tḥuza tmes-a, ad naf Busfer, Msergin, Arzew d Gdeyel. Ma d aggur ideg i tzad s waṭas tmes, d aggur n yulyu, imi tessaweḍ tečča 107 n yigeṭṭaren. Annect-a, yeǧǧa tanmehla-a ad d-tger tiɣri i uḥader, akken ad qqiment tẓegwa cebḥent, ur reqqen ara yisekla ladɣa wid ur d-nettuɣal ara seld timerɣiwt-nsen.
Khaled Achoui