Deg yiwen n wulɣu i d-tesuffeɣ i uzayez d tɣamsa, tettcektay tddukkla tadelsant Tiɛwinin, n tɣiwant n Buzgan, seg usewḥel n taggazt-is (subvention) sɣur yimḍebbren n twilayt. Dɣa, gar wayen tqeddec deg unnar adelsan, d timlilit taseklant i d-tettheggi tddukkla i ihewwlen kra n yimḍebbren n twilayt n Tizi Uzzu, ɣef wawal n wid i d-yuran ulɣu. Imi, ma nesmektay-d kan, ḥawla n tikkal i d-berrḥen yimheggiyen n teɣlust taseklant ɣef yiɛewwiqen i as-d-xeddment kra n tamiwin, gar-asent tadayra n Buzgan.
Akken i d-yewwi uberriḥ, iban-d tettwasewḥel tedrimt sɣur tedbelt n twilayt n Tizi Uzzu i yugin, s ubrid n Tenmehla n tedbelt tadigant (DAL), ad d-tserreḥ i tedrimt-nni i d-yefka Useqqamu aɣerfan awilay (APW) n Tizi Uzzu. Seg yiwet n tama, ɣef wawal n yiɛeggalen n tddukkla, yella yenna-asen-d unemhal n tedbelt tadigant (DAL) d akken ilaq ɣef uselway n tddukkla Tiɛwinin ad yerzu ɣer uxxam n tɣellist n Tizi Uzzu akken ad d-serrḥen i tedrimt-nni. Ɣef rray amatu, acewwel n tddukkla-a sɣur yimḍebbren icudd ɣer warmuden-is idelsanen, tugart timlilit taseklant, ur nehwi i kra.
Aṭas n tikkal, yuɣ lḥal, i tegguma tdayra ad tefk ttesriḥ i yiɛeggalen akken ad suddsen di talwit asarag-nsen. Qqaren-d yiɛeggalen, segmi tebda teɣlust taseklant, tessewɛar-asen tedbelt tilufa. Rnu, ur bɣin yimasayen mi d-kkaten wat Tiɛwinin deg yiqeddacen n « Drag » n « Dal ». Ulamma ulac tadrimt, teḥres akka tegnit ɣef tddukkla-a tilemẓit i d-ilulen deg useggas n 2013, ur heggan yiɛeggalen-is ad brun i ṭṭbel deg waman, d warmuden akk i d-ssuddusen teɣzi n useggas, am yisaragen, amezgun, tazabut s teqbaylit, d usfuggel n yimulliyen imezrayen neɣ idelsanen. D aya i yeǧǧan dɣa Tiddukkla Tiɛwinin, ad d-tger tiɣri i tbezzart di internet akken ad tizmir ad tkemmel i wahil-is n tigawin.
M. K.