Accueil Tamazight Tettwaker lbanka n temdint

Leqser

Tettwaker lbanka n temdint

38

Seg tikkelt ɣer tayeḍ, nsel s kra n yisallen i d-yettmeslayen ɣef tigawin n tukerḍa i d-iḍerrun deg tama-a neɣ deg tayeḍ. Maca aneḍruy i d-yellan ass n ahad yezrin deg tlemmast n temdint n Leqser, iɛedda tilisa. Imi ɣef 9h n tsebḥit i ẓeḍmen sin n yiterrasen i iɣummen udmawen-nsen s ukagul i ttgen yimkerḍen deg teswiɛin am tigi, akken ur ttwaɛqalen ara, rnan wwin yid-sen snat n tmeẓyanin.

S imi kecmen ɣer daxel n lbanka n unegmu adigan (BDL), rran srid ɣer wanda ttwajemɛen yidrimen, ukren amelyar d 500 n yimelyunen, uqbel ad ṭṭfen abrid-nsen n trewla s tɣawla. Ɣef wakken i d-tewwi teɣbalut-nneɣ, imir-a yewweḍ lexber iɣallen n laman ur nebɛid ara ɣef wadeg n uneḍruy, maca ifat lḥal mi wwḍen s amkan, imi sin-a n yimukar tuɣ-iten ffɣen, rewlen. Ayen yeswehmen kra n yimezdaɣ i iqerben, d wid iwalan tigawin s wallen-nsen, d amek ssawḍen ad kecmen ɣer lbanka i yellan d ayla n uwanek, tezga-d deg tlemmast n temdint meqqren u deg uzal qayli, ad rren srid ɣer wanda llan yidrimen, ad xedmen ccɣel-nsen u ad selken seg tuṭṭfa?

D asteqsi ur nesɛi tiririt, neɣ ma iban-d kra n ttbut seld tullya n tsastant sɣur imsulta d wid teɛna temsalt. I usmekti, ilindi akka imir-a, tella-d ẓẓeḍma sɣur sin n yimdanen dima yettwaselḥen ɣef yiwet tḥanut n ddheb deg taddart n Tuǧa, ukren tuget n wureɣ yellan daxel, war ma ttwaṭṭfen. Ɣef waya, yewwi-d ad sḥersen yiɣallen n laman lɛessa akken ad d-ters talwit deg temdinin.

Kh. A