Accueil Tamazight Tewweḍ lɣella ɣer ugar n 600 n yiqenṭaren n tamemt

Aṛebbi n tzizwa deg Wehran

Tewweḍ lɣella ɣer ugar n 600 n yiqenṭaren n tamemt

64

Aṛebbi n tzizwa d yiwen n leqdic iḍefren wid iḥemmlen agama, ma neẓra abaɣur swayes i d-tgellu tamemt, ama i lǧib-nsen, ama i tdawsa d ddwa akk i d-nettagem seg-s. Taggara-a ladɣa, tennerna mliḥ taɣult-a deg umaḍal, ula di tmurt-nneɣ d abrid-a i teḍfer. Deg Wehran, deg sin n yiseggasen-a yezrin kan, yella-d ufares n 635 n yiqenṭaren n tamemt.

D afares igerrzen ma nesserwes-it ɣer win n yiseggasen yezrin. Sser n wannect-a, d lebɣi i sɛan yifellaḥen-a d wigi yettṛebbin tizizwa, yerna skud ma tettnernay. Yiwet n ssebba-nniḍen i d-yernan di lɣella-a, d tallelt i d-ttafen sɣur tixxamin n tfellaḥt, ɣef wakken i d-nnan kra seg wigad-agi yettṛebbin.

Ad naf llan wazal n 600 seg wid iqeddcen deg unnar-a, 180 deg-sen d wid ilan tikarḍiwin tisudar. Ayen daɣen yesnernan aḥric-a, d timliliyin n usileɣ i d-yettilin yal tikkelt, qrib ahat deg yal akraḍyur tettili-d yiwet n temlilit sɣur tddukkliwin, sɣur tinmehliwin d texxamin n tfellaḥt i usnerni n uswir n yifellaḥen-a d uwelleh-nsen d tarrayin i ilaq ad ḍefren akken simmal ad tettnerni lɣella-a, d kra n yiberdan i d-yewwi ur ten-sseqdacen ara deg unnar, acku gellun-d s lexsara d lmut n tzizwa. D tililiyin-a i yeǧǧan ad d-ffɣen 300 n yimsulaɣ imaynuten deg sin n wasunen kan, Ḥasi Bunif d Msergin yettwassnen s yidgan-nsen n tfellaḥt d lfirmat meqqren.

Khaled Achoui