Accueil Tamazight Tewwi arraz wis tlata deg Temsizzelt Aïssat Rabah n taddart zeddigen

Taddart Iẓerruden

Tewwi arraz wis tlata deg Temsizzelt Aïssat Rabah n taddart zeddigen

61

“Akken yebɣu yili umḍiq i tqesdeḍ, ad ak-id-maggren yirgazen d tlawin s wawal ẓiden, s wul yeččuren d lxir”. Iẓerruden, d yiwet n taddart gar tudrin n tɣiwant n Tirmitin deg wasun n Draɛ Ben Xedda. Ɣlin deg tegrawla n 1954 azal n 42 n yimeɣrasen, xas ulamma teqqel d taddart yettwattun syin ɣer da, daymi yunag umur ameqqran n yimdanen-is, ɣef wakken i t-id-nnan yimezdaɣ-is. Seg tama n yimezdaɣ, dɣa, ad naf Iẓerruden deg umḍiq wis sin s 3 000 n yimdanen deffir n taddart Tirmitin Ufella.

Tettwassen diɣ, s waṭas n lḥirfat yecban talaɣt, azeṭṭa, taxeyyaḍt, iqecwalen, ttrebga n tzizwa, ttrebga n lmal d waṭas n lḥirfat-nniḍen. Am waken I mechuret diɣen s uɣerbal “Akka kan i d-necfa. Aṭas n twaculin i yettidiren yis-s. Ass-a, ulamma banen-d ttawilat imaynuten n uftal n seksu meɛna aɣerbal yeqqim d ttrika n taddart imi t-terfed tsuta n tura”, i d-yenna Mass Kebir, aselway n tddukkla Agama u d amaswaḍ n tmaziɣt. Seg tama tadelsant, Iẓerruden, d Yasmina, d Remḍan Ɛliwat d waṭas n yicennayen d yimedyazen-is. Iẓerruden diɣen, d Mass Kebir, amaswaḍ, amnadi deg tutlayt tamaziɣt. “Iẓerruden ass-a, d lmeyyat n yilmeẓyen d temeẓyin i yekkaten ad beddlen udem i taddart-nsen alamma tuɣal d amedya gar tuddar.

Win ara d-yerzun ɣer taddart Iẓerruden, ilaq ad yerzu ɣer usebdad n yimeɣrasen, tajmaɛt, tala, izenqan n taddart d yixxamen deg ara iẓer s wallen-is amek i d-tettili lxedma n uɣerbal. Akken yebɣu yili umḍiq i tqesdeḍ, ad ak-id-maggren yirgazen d tlawin s wawal ẓiden, s wul yeččuren d lxir”, ikemmel deg wawal-is Mass Kebir. Deg tezrigt tis 7 n Temsizzelt Aissat Rabah n taddart zeddigen, tezga-d taddart Iẓerruden deg umḍiq wis tlata. Arraz i as-d-iḥellan 6 n yimelyan n yidinaren.

Hocine Moula