Deg yiseggasen-agi ineggura, tezga Tenmehla n srabes n tfellaḥt n ugzdu n Tizi Uzzu d leqdicat yemgaraden, ama d timliliyin tussnanin, ussan n tussna d uwelleh, asuddes n rreḥbat n yisufar iqburen, asefqed n yisenfaren n tfellaḥt neɣ iberden n tfellaḥt. Thegga-d Tenmehla yiwen wahil s wazal-is i waggur n cutember, anda ara naf, deg tazwara , timlilit ara d-yilin ass n larebɛa, 18 seg waggur n cutember, ɣef 09h00 n tsebḥit, deg Uxxam n tfellaḥt n Tizi Uzzu, i usqerdec n tecrawt (bilan) n tsemhuyt n tmegra d userwet, 2018/2019.
Rnu ɣef waya abeddel n tektiwin ɣef temsal i icudden ɣer uheggi n tsemhuyt n ukraz d teẓẓtin, 2019-2020. Ad ḥeḍren timlilit-agi yimḍebbren n Uxxam n tfellaḥt n Tizi Uzzu (CAW), Tanmehla n srabes n tfellaḥt (DSA), Aseqqamu n lwilaya n gar usader n uḥric n ufares (céréale) ( CWIF céréales) , Tamyawest n ufares d tidelt yeqquren ( CCLS) n Draa Ben Khedda, Lbanka n tfellaḥtf d unegmu (BADR), Asenduq anemnaḍ n umyawel n tfellaḥt (CRMA ), Tasdut n ITGC akked Tesdut n INSID. Thegga-d daɣen yiwen n wass n tussna ɣef yidles n Safran , ara d-yilin ass n lexmis, 19 deg waggur n cutember 2019, deg Ulemmas n ITMAS n Boukhalfa, ɣef 9h00 n tsebḥit.
Ad ḥeḍren deg wass-agi n tussna, Tanmehla n Srabes n Tfellaḥt, Tiddukkla Taɣelnawt n Safran, Axxam n Tfellaḥt n Tizi-Uzzu, Tiddukkla n Tlawin Timesdurar, BDAR, ANSEJ, CNAC, CRMA, ANGEM, Tasdut n Uḥraz n tẓegwa.Ma d ass n letnayen, 23 seg waggur n cutember 2019, ɣef 9h00 n tseḥit, deg tɣiwant n Illula Umalu, ad d-tili yiwet n temlilit tussnant ɣef unegmu n yidles n tbexsisin d ineɣman deg ugezdu n Tizi Uzzu. Ad d-sidren timlilit-agi, Tanmehla n Srabes n Tfellaḥt, Axxam n Tfellaḥt, Tasdut n Uḥraz n tẓagwa, ITMAS, ITAFV, INRAA, SRPV n Draa Ben Khedda, CRMA d Tiddukkla Tadelsant Tiɣilt n Lamsella n Ilulen Umalu. Am waken ara tili daɣen yiwet n temlilit tussnant, ass n lexmis, 26 cutember 2019, ɣef 9h00 n tsebḥit deg Ulemmas n ITMAS n Boukhalfa, deg ugezdu n Tizi Uzzu, ɣef unegmu n lɣella n ukermus deg Tizi Uzzu.
Ad d-sidren timlilit-agi, Tanmahla n Srabes n Tfellaḥt n Tizi-Uzzu, Axxam n Tfellaḥt n Tizi Uzzu, ITMAS, ITAFV, CRMA, HCDS, INRAA, SRPV, d Tiddukkla Taɣelnawt n Ukermus. Deg taggara n waggur n cutember, ad d-tessewjed Tenmehla n Srabes n Tfellaḥt n Tizi Uzzu yiwet n temlilit tussnant tanemnaḍt ɣef unegmu n uḥric n uyefki deg Tizi-Uzzu. Ad tili temlilit deg Ulemmas n ITMAS, ma d azemz mazal urɛad i d-yettunefk sɣur yimḍebbren teɛna temsalt. Ad ḥeḍren timlilit-agi, Tanmehla n Srabes n tfellaḥt n Tizi Uzzu, Axxam n Tfellaḥt n Tizi Uzzu, CWIF n uyefki, ONIL, ITMAS.
A. Z.