Accueil Tamazight Tiɣin n yimsismaḍ i yiɣerbazen

Tasexriwt

Tiɣin n yimsismaḍ i yiɣerbazen

31

Tezga-d tɣiwant n Tsexriwt deg Unẓul-asamar n waɣir n Bgayet, s tebɛed n wazal n 55 n yikilumitren seg-s. Ddeqs-aya segmi ccektayen yiqeddacen deg kra n yiɣerbazen imenza akked yimawlan n warrac, seg lexsas n wallalen n usismeḍ n tgelliwin yemgaraden i d-ttakken i warrac inelmaden deg tneččiyin. Dɣa, seld aqabel n tegnit iweɛren akken i d-tusa, anebdu yezrin abeɛda, a-t-an uɣen-d ssrabes n tɣiwant-a kra n yimsismaḍ imaynuten ara igen talast i wugur-a n uḥraz n yigumma d tidal. Ad d-nesmekti d akken asenfar-a n tiɣin n yimsismaḍ, yerza kan iɣerbazen imenza n Tsexriwt. Seld tigawt-a, ddeqs n yimezdaɣ i d-ibeggnen atthenni d tumert, imi sya d tasawent ur seɛɛun anezgum n uhlak n tarwa-nsen seg tgella yemmuten. «D ayen yelhan wayen texdem tɣiwant lwaḥi d tenmehla n uɣerbaz i lmend n tuɣalin-a tiɣurbizin d yiseggasen i d-iteddun.

Nessaram kan ur ttɣiman ara d ilmawen yimsismaḍ-a akken ad rewwun akken ilaq warrac-nneɣ », i d-yenna yiwen n umezdaɣ n tɣiwant n Tsexriwt. Deg usentel-a n tneččiyin, tettwaldi tneččit tamaynut deg uɣerbaz amenzu Agermammuc, ayyur n cutember yezrin. Dima ɣef wayen yerzan iɣerbazen imenza n temnaḍt daɣ, ad d-nerr awellih belli yella-d ussan-a kan usizdeg d ufras deg uɣerbaz amenzu n Lberj n Mira talemmast. Imi d-teṭṭef teẓgi amur d ameqqran deg kra n yimeḍqan, kkren wid teɛna taluft i twizi akken ad fersen tallunin, ad kksen ayen akk izemren ad d-yawi timḍerrit i warrac imecṭaḥ. «Ugar n wayen i d-yettilin d tigawin daxel uɣerbaz, nebɣa ad muqlen yimḍebbren ula ɣer berra, tugart iberdan imeqqranen n tkeryas ansi ttɛeddayen yinelmaden-nneɣ igerdan », i d-yenna yiwen n umezdaɣ n Lberj n Mira.

M. K.