Accueil Tamazight Tiɣri n tddukkla tadelsant Adrar n Fad

At Smaεel

Tiɣri n tddukkla tadelsant Adrar n Fad

176

Am yal aseggas, tberreḥ-d tddukkla tadelsant Adrar n Fad ɣef useqleε n teẓrigt tis mraw d sa (17) n tmedyazt tamaziɣt, d tajmilt i Lmulud At Mεemmer. Di tfaska n useggas-a, imḍebbṛen n tddukkla-a, bɣan ad tili d tajmilt i tmedyazt tamarut Kaysa Xalifi fell-as talwit, i d-yefkan ayendin n wayen yelhan i tsekkla d tɣamsa tamaziɣt s umata.

Adrar n Fad akken i d-yessbeyyin yisem-is, d adrar yeffuden tamussni, arraw-is d wid yettnadin, d wid yettaken azal i yidles. D ayen i ten-yeǧǧan fkan-as i tddukkla-a afus n tallelt deg yal tama. Am yirgazen, am tlawin, iswi-nsen d yiwen: ad as-ffken i tmedyazt d yidles s umata, azal i yuklal. Ama d iεeggalen n tddukkla, ama d imezdaɣ, yal yiwen ixeddem ayen iwumi yezmer i wakken ad tesmurres temlilit, ara d-yilin ussan n 28, 29 d 30 deg meɣres 2019.

Ad d-nesmekti d akken atekki n wat wawal deg temsizzelt-a, yesεa iṣuḍaf-is imi deg usiwel-a, berrḥen-d fell-asen: Imedyazen, ilaq ad sεun ugar n 18 n yiseggasen, am akken daɣen i d-yewwi fell-asen ad ttekkin s kṛaḍ n yisefra imaynuten. Rnu i waya, tira ilaq ad tili s tira tamaziɣt tamirant s ttawil n uselkim. Isefra-a ad ten-aznen ɣer tansa n tddukkla tadelsant Adrar n Fad uqbel 26 di furaṛ 2019. I ugar n yisallen, wid yebɣan ad kkin zemmren ad kecmen ɣer usebter-nsen n Facebook.

K. K.