Accueil Tamazight Tiɣri n uttekki deg tezrigt tis 7

Arraz aseklan n Mohamed Dib

Tiɣri n uttekki deg tezrigt tis 7

103

Tberreḥ-d tesqamut n warraz aseklan Mohamed Dib, s tiɣri n uttekki deg tezrigt tis sat (7) n warraz aseklan Mohammed Dib n useggas-a 2019-2020. Am yal aseggas, mḥezwaren fell-as aṭas n yineggalen, yettarun s 3 tutlayin-a: Tamaziɣt, tafransist akked taɛrabt.

Imsizewren yebɣan ad ttekkin deg tezrigt tis 7 n Warraz ameqqran n wungal “Mohamed Dib”, yessefk ad ceggɛen ungalen-nsen uqbel ass n 05 yennayer 2020. Ma ɣef tegnatin n uttekki, yenna-d wulɣu n warraz-agi “ilaq ad ilin wungalen swayes ara ttekkin d imaynuten; Ttwasargen-d ɣer tezrigin tizzayriyin, gar 01 n waggur n tuber 2018 alamma d ass n 05 yennayer 2020.

Ilaq ad ttwarun s tlata n tutlayin-agi: Taɛrabt, tamaziɣt akked tefransit. Ala ungalen ay d-yeffɣen deg tmurt n Lezzayer yernu uran-ten yimeskaren izzayriyen i yesɛan azref ad ttekkin deg warraz-agi ameqqran”.

Mebɛed ass n 07 yennayer 2020, ara yilin d ass aneggaru n ussersi n wungalen ara i ttekkin deg tezrigt-agi tis sebɛa, ad tili tɣuri n wungalen-agi sɣur tesqamut n ufran, ideg ara yilin yimura d yimussnawen n tsekla n tlata n tutlayin-agi i d-nebder yakan. Yal aneggal, yebɣan ad ittekki deg tezrigt-agi tamaynut, ilaq fell-as ad iqader isuḍaf iɣef yebna warraz-agi.

Tamezwarut, ad iceggeɛ ungal-is s talɣa n PDF d tduli n udlis-agi, uqbel 07 deg waggur n yennayer i d-iteddun, ɣer tansa-agi taliktrunit: contact@lagrandemaisondedib.com.

Tis snat, ad yazen daɣen sin wungalen-is s talɣa n lkaɣeḍ (ungal s timmad-is), ɣer tansa-a: Association culturelle La Grande Maison. El Mechouar-BP 364. Tlemcen 13000. Tis kraḍet, ur ttaṭtafen ara ungalen n yineggalen yemmuten neɣ wid iwumi i d-ugin yakan idisen-nsen deg tezrigin iɛeddan. Ilaq daɣen, ungal ad yesɛu ma drus 100 n yisebtar, i wakken ad yettekki yis-s bab-is.

Ma d zzmamat n uttekki, ad ilin akka: Tuttra yettwarun s ufus, tiferkit n yisallen n umeskar, aglam n wungal deg yiwet n twarqet, d yiwet n tugna i yal amsizwer. Iswi n temsizwert-a, d asebɣes n tira n wungal akked usebɣes daɣen n yineggalen. D asiher i d-yettuɣalen yal taggara n useggas, i ttraǧun s ccuq yimura akked yimeɣriyen. Ma d asenqed n wungalen, yettili-d ɣef snat-agi n tulmisin: Azal aseklan n wungal d ccbaḥa-ines d wacu i d amaynut i d-yewwi i tsekla tazzayrit.

Ɣer taggara, ad d-nini belli, yella daɣen warraz Mohamed Dib n tullist yufraren, isuḍaf n uttekki-ines d widak n wungal. Ad d-nesmekti s yineggalen i d-yufraren deg tezrigt yezrin: Fahim Messaoudene, i yewwin arraz-agi n tutlayt tamaziɣt s wungal-is “Anza”. Ma s tutlayt n tefransist d Mohamed Saadoun, i d-yufraren s wungal-is “Débâcle”, ma s taɛrabt, yufrar-d Yebrir Smail s wungal-is “Bab n Lḥara”.

A. A.