Accueil Tamazight Tiɣri i tikkin deg umsizwer n tullisin

Tidukkla n udrar n Fad : Tiɣri i tikkin deg umsizwer n tullisin

211
- PUBLICITÉ -

Tesnulfa-d tddukkla tadelsant Adrar n Fad deg useggas n 2017 amsizwer n tullisin Mulud At Mɛemmer i usebɣes d usker n yilemẓiyen imura, ara yilin ahat azekka d itran n tsekla taqbaylit abeɛda, d tmaziɣt s wudem amatu. Ugar n tfaska ideg i d-yettili umsizwer ansayan n tmedyazt, nwan yiɛeggalen n tddukkla-a, i d-yennulfan deg useggas n 1994, ad ḥazen tawsit-nniḍen n tsekla s usbedd n warraz Mulud At Mɛemmer n tullist, di leɛḍil ad d-nnulfun ɣer sdat warrazen-nniḍen, am win n wungal.

- PUBLICITÉ -

I lmend n teẓrigt tis kraḍ ihi, teggar-d tiɣri tddukkla tadelsant Adrar n Fad i yimura i yebɣan ad kkin, ad aznen tullist-nsen ɣer tansa-a n umayl [email protected], send 15 deg duǧember i d-iteddun. Neɣ ɣer tagi: Tidukkla Tadelsant Adrar n Fad Cidex N° 03 BP 105 Ayt Smaɛel 06044 Bgayet. Ad d-nesmekti d akken tullist ara yettwaznen, yewwi-d ad tili tettwaru s yilugan imiranen n tmaziɣt, tasefsit n Times New Roman, tiddi 14. Tullist daɣen, ur ilaq ara ad tili tewwi yakan arraz deg walbaɛḍ n yimsizwar.

Ma d ayen yerzan asentel n tullist, ad yeqqim ar tura d ilelli, ulamma ttxemmimen yimsuddsen ad as-fken i yal taẓrigt ṭṭabeɛ s usmuzzeg n usentel yal aseggas. Yewwi-d ad d-nerr awellih daɣen ɣef wayen yerzan isuḍaf n tikkin, imi yemmug umsizwer i wid yesɛan nnig 18 n tefsutin. Seg duǧember d asawen, mi ara wwḍen yiḍrisen n yimekkiyen, ad ten-skazlen yiɛeggalen n teseqqamut n yinezzurfa, ideg yella udukṭur Ɛellawa Rabḥi, syinna ad tili tfuggla n tikci n warrazen di tfaska n tmedyazt tamaziɣt n meɣṛes 2020. «Nessaram simmal ad nseɛɛu ugar n yimekkiyen, simmal ad ttwenniɛen yilemẓiyen-nneɣ deg umaḍal n tullist. D wa i d iswi n tddukkla», i d-yenna yiwen n uɛeggal n tddukkla tadelsant Adrar n Fad.

K. K.

- PUBLICITÉ -