Accueil Tamazight Tiɣri n umsizwer i yiḥeddaden n wawal

AQBU - Timlilit tis 13 n tmedyazt n tamaziɣt n Ṣummam : Tiɣri n umsizwer i yiḥeddaden n wawal

38
- PUBLICITÉ -

D tiddukkla “Itri n adelsan n Uqbu”, ara d-isuddsen timlilit tis mraw d kraḍet (13) n Tfaska taɣelnawt n tmedyazt tamaziɣt n Ṣummam, ara d-yilin seg 26 alamma d 29 deg duğember 2019. I lmend n waya, tger-d tiɣri i wid yettfeṣilen awal i wakken ad jerden iman-nsen deg temsizzelt-agi n tmedyazt, ara d-yilin deg Uxxam n Yilmeẓyen Abderreḥman Fares n temdint n Uqbu, deg lwilaya n Bgayet. Timlilit-agi, ad tt-gen d tajmilt i unaẓur d umedyaz ameqqran Ḥmed Laḥlu. Ma d wid neɣ tid yebɣan ad ttekkin deg tfaska-agi-agi n tmedyazt deg tezrigt-is tis 13, ilaq fell-asen ad aznen 3 n yisefra-nsen, yettwarun s ttawil n uselkim, s tutlayt n tmaziɣt, yerna s usekkil alatini. Ma d ass aneggaru ideg i ilaq ad awḍen yisefra n wid yebɣan ad ttekkin, ad yili ass n 30 seg waggur n unbir i d-iteddun.

- PUBLICITÉ -

Ad tili tuzna n yisefra ɣer tansa-agi taliktrunit: [email protected] acu kan ur ilaq ad iseddu umsizwer isem-is neɣ uṭṭun n usiwel-is deg yisefra-agi ara yazen. Ɣef wakken i t-id-nnan yimsuddsen n leqdic-agi deg wulɣu-nsen, ad d-yili uqbel usɣerbel n yisefra-agi sɣur teseqqamut n uktazal, uqbel timsizzelt. Syin akkin, wid i d-textar tesqamut-a, ad asent-siwel tddukkla-a i wakken ad ttekkin deg temsizzelt-a ara d-yilin gar 26 d 29 duǧember 2019. Ma i wugar n yisallan, ssiwlet ɣer wuṭṭun-agi: 034 33 45 78 neɣ 0775 54 57 76. D tiɣri i yiḥeddaden n wawal neɣ d win yettewzanen awal deg usefru-s, yessefk kan ad yili yiles-is d amaziɣ, daya.

Imi d timsizzelt ara yesqerdecen tamedyazt tamaziɣt s tantaliwin-is yemgaraden: taqbaylit, tacenwit, tamahaqt…atg. Am wakken diɣ, i d-gren tiɣri yimsuddsen-agi ama i yimedyazen yesɛan ammuden, i wakken ad ten-senzen s ubuddu, ama i wid irebḥen arrazen deg temliliyin iɛeddan i wakken ad ilin d inebgawen n lɛezz d lḥerma. Yetturaǧu ad yili wahil n tfaska-agi d anesbaɣur; gar isaragen ɣef tmedyazt, timsikniyin yemxalafen, asenzi s yibuddan n yidlisen ladɣa wid n tmedyazt, tajmilt i Ḥmed Laḥlu. Ad d-nesmekti kan belli tiddukkla-agi “Itri Adelsan n Uqbu”, tebda leqdicat-is s wudem unsib ass n, 2 deg meɣres 1976. Ma d tafaska-agi tebda deg useggas n 2005, yal aseggas yettili-d deg-s umaynut.

Ghani Amazigh

- PUBLICITÉ -