Accueil Tamazight Tiɣri n uttekki i yimsizewren

Arraz Mohand Akli Haddadou i tsekka taseklant ifazzen

Tiɣri n uttekki i yimsizewren

146
- PUBLICITÉ -

Tiddukkla tadelsant-timettit Agraw n taddart n Takhlidjt deg tɣiwant n Chemini di Bgayet, thegga-d tazrigt tis snat n rreḥba n udlis “Agora du livre”, gar 16 d 20 ɣuct i d-iteddun.

- PUBLICITÉ -

Tazrigt n useggas-a, temgarad ɣef tin iɛeddan, imi i d-snulfan arraz Mohand Akli Haddadou i tsekka taseklant ifazzen, s tallelt n Useqqamu Unnig n Timmuzɣa. Arraz-agi, yella deg snat n tewsatin: Ad yettunefk i tsekka taseklant ifazzen ara d-yufraren deg temsizzelt-agi. Tasekka-a (ouevre), ilaq ad yili d tullist neɣ d ungal yettwarun s tmaziɣt.

Am wakken, ara yettunefk daɣen warraz-a i tsekka tussnant yettwarun s tmaziɣt neɣ ɣef tmaziɣt. Zemren ad ilin yimuhal n tsekka-agi d imagraden d tezrawin akked yidlisen deg taɣulin-a: Taseddast, tasnamekt, tasnawalt, tasnalɣa, tasenmeslit…atg. Ma ɣef yilugan n temsizzelt-a, ilaq umsizwer ad iqadder iwellihen i d-fkan yimsuddsen n warraz-a.

Tamezwarut, tasekka swayes ara yettekki, ur ilaq ara ad tɛeddi ddaw n 2016, imi ilaq ad tili tettwaru gar 2017 d 2019. Iḍrisen ara yettwaceggɛen, ilaq ad ilin ttwarun s talɣa n Word s usekkil n Time New Roman, s tuzart n 12, ilaq daɣen ad sɛun gar 20 d 100 n yisebtar. Yessefk ɣef umsizwer ad yazen sin n yigzulen n uḍris-is, yiwen s tmaziɣt wayeḍ s tefransist neɣ s taɛrabt, ɣer tama n tmeddurt n umeskar, ara yilin gar 8 ar 10 n yijerriḍen.

Ilaq ad ttwaznen uqbel 05 ɣuct 2019 ɣer tansa taliketrunit: [email protected]. Yetturaǧu ad yili wahil d anesbaɣur deg rreḥa-agi tis snat n udlis, gar tejmilin i Mohand Akli Haddadou, Ahmed Lahlou, timsikniyin, isaragen isenza s ubuddu akked waṭas n leqdicat-nniḍen.Ɣer taggara, ad d-nesmekti belli Mass Mohand Akli Haddaou, d aselmad n tesdawit, yeqdec deg unnar n umezruy n tutlayt d tɣerma tamaziɣt. Ɣur-s ugar n 20 n yidlisen i d-yessuffeɣ deg waṭas n yiḥricen yerzan agdud amaziɣ d tutlayt-is. Yemmut ass n 19 unbir 2018, di leɛmer-is 64 n yiseggasen.

A. G.

- PUBLICITÉ -