Meskud tcaḍ tsuta i izeglen almad n tutlayt-is tanyemmat deg uɣerbaz, ala ttawil n internet, idlisen d uheggi n temsirin i d-yeqqimen i win ur nebɣi ad yemmet d awreɣri (analphabète) di tutlayt-is. Dɣa, deg yiwen n yiswi, aṭas n tddukkliwin i d-yettheyyin timsirin n ulmad n tutlayt taqbaylit deg ukuẓ n tɣemmar n tmurt n Yiqbayliyen. Dɣa, ussan-a kan, tlul-d tikti-a daɣen ula deg tɣiwanin n Ukeffadu d Ticci. Deg Ukeffadu, tella-d tiɣri i yakk imezdaɣ n tɣiwant, amecṭuḥ d umeqqran, i yebɣan ad lemden tutlayt-nsen. Ad d-yettili waya, akken i d-yedda deg wulɣu, yal taggara n ddurt deg temkarḍit taɣiwant n Tniri n Ukeffadu, sɣur uselmad Ḥamid Ihden. I win yebɣan ugar n yisallen, yezmer ad isiwel i wuṭṭun-a: 07 93 39 53 99.
Ma deg temnaḍt n Ticci, d aselmed ara yilin ɣef yiri n snat n tselmadin, Massat Nasima Xuxi d Lindi Buseksu, s uheggi n tddukkla tadelsant Asaki n Ticci i d-yettwassnen s warmuden-is idelsanen, abeɛda akuden-a ineggura. Ɣef wayen i d-tewwi teɣbalut-nneɣ, ad d-ttmaggant temsirin n ulmad yal ass n sed tameddit, deg Uxxam n yilemẓiyen n Bakaru. Si tama tayeḍ, ulamma yella lebɣi ɣur yilemẓiyen n umussu asdukklan, yewwi-d ad d-nemmeslay ɣef wugur i d-yettwattemlilayen ɣur tmetti deg teɣriwin-a i ulmad n teqbaylit, imi drus i d-yettarran. Amedya n tɣiwant n Ayt Smaɛel, deg usamar n Bgayet, ideg i d-grent teɣri tddukkliwin Adrar n Fad d Usirem n Krun deg useggas n 2017, maca ulac win i d-ibeggnen aheggi-ines. Ahat imi ssuma tazamulant tella imir-nni 500 n yidinaren i wayyur.nAkken yebɣu nuḥen yiɛewwiqen, llan wid i d-iferrsen abrid. Wamma, akken yenna Dda Lmulud At Mɛemmer: «Win yebɣan tamaziɣt, yissin tira-s».
M. K.