Accueil Tamazight Tidet deg targit d ungal amenzu n Zoulikha Touati

Ajdid di tira

Tidet deg targit d ungal amenzu n Zoulikha Touati

106

Yerna-d taggara n ddurt iɛeddan, yiwen wungal amaynut ɣer taffa n wayen yellan uqbel. Yal wa s tikta-s neɣ ɣef yisental iɣef yettaru, maca iswi d yiwet d taqbaylit. Tineggura-a, tufrar-d tewsit-agi n tsekla (ungal) ɣef tewsatin-nniḍen, yecban timucuha, inzan, tullisin…atg. “Tidet deg targit” d ungal amezwaru n tmedyazt d tmarut Touati Zoulikha, yettwassnen s yisem n Hakima Touati. D ungal n 142 n yisebtar, yebḍan ɣef 20 n yixfawen, ad d-nebder gar-asen: Aɣerbal n ddunit, Tamurt n Tirga, Tuɣalin n Tidet, Mazal lxir ɣer sdat…atg.

Deg usebtar amezwau n udlis-a, tettban-d tugna n umḍiq imḍelles (ṭṭlam) d cwiṭ n tafat ɣer tama n uzwel akked yisem n umeskar d tewsit n udlis-a. Ma deg usebtar aneggaru n tduli, ad naf abruy seg tmeddurt n tneggal-agi d wayen tura ɣer tama n tukkist seg udlis-agi. Ungal-a, yebna ɣef yiwet n teqsiḍt yeḍran, meεna ulac aṭas i tt-yecban. Temmeslay-d deg-s ɣef kra n leεwayed yellan gar yimdanen n zik-nni, s yiwen udem yeččuren d tafelsafit. Ha-tt-an tukkist seg-s “Tidet tezdeɣ deg Tmurt n Tirga, yettidiren deg Targit, tezweǧ d Usirem, ɣer Tmurt n Usuffeɣ n Tirga, sseɛd-is inuda-d ɣef zzher-is. Tidet, d tin yeṭṭfen deg nnif-is, terra lḥerma i twacult-is, xas tekcem daxel n yiḥulfan…”

Tmeddurt d umecwar n tmeskart

Di taggara, ad d-nesmekti s tmeddurt n yimuhal n tmeskart-agi. Zoulikha Touati, tlul ass 24 maggu 1967, deg taddart n Yitqerri taɣiwant n At Yeɛla di Genzat, lwilaya n Sṭif. Tettaru s tutlayt n taɛrabt d tin n tmaziɣt, ha-t-a wayen tura: “Inuda ɣef zzher-is, yufa-t”, d tamacahut s teqbaylit, i d-tessuffeɣ di 2012, syin di 2013, d ammud n yisefra s taεrabt, i wumi tsemma “Acmumeḥ deg teṭṭucin iḥeznen”. Di 2014, terna-d adlis-is wis tlata, i yellan d tamacahut tis snat, tga-as azwel “Yelli-s n yiɛiqer” , deffir-s kan terna-d ammud-is wis sin n yisefra, acu kan tikkelt-agi s teqbaylit, yewwi azwel “Awal ibennu, yetthudu”, di 2015. Am wakken daɣen i tella d taselway n tddukkla tadelsant Ixulaf n Ǧerǧer n lwilaya n Tizi Uzzu.

A. A.