Accueil Tamazight Tikci n yisefkan i wat n BAC

At Mlikec : Tikci n yisefkan i wat n BAC

42
- PUBLICITÉ -

Tezga-d tɣiwant n At Mlikec deg twinest n Tezmalt, s tebɛed n wazal n 80 n yikilumiṭren ɣer Unẓul-amalu n waɣir n Bgayet. Tettwassen abeɛda s umezruy-is iqerben, imi d taddart i d-yefkan lqidar n 1 000 n yimeɣrasen di tegrawla n 54-62.

- PUBLICITÉ -

Ussan-a kan dɣa, s tallelt n uxxam n tɣiwant, thegga-d dinna tddukkla tussnant n At Mlikec « Tibḥirt n tmussni » tafugla i yilemẓiyen i d-yewwin akayad n BAC seg yigemmaḍ i d-yeffɣen ass n 18 yulyu. Deg 88 n yinelmaden n uswir wis kraḍ i yettwajerrden deg Tesnawit 1000 n yimeɣrasen, 49 seg-sen ssawḍen ḥellan-d tasiregt-nni n uɛeddi ɣer tesdawit. Di tfuggla-a i yemmuggen deg tesnawit, ḥeḍren yimḍebbren n tɣiwant d tdayra akked kra n yinebgawen i d-ɛerḍen yimheggiyen i tegnit-a.

Deg wawal n unemhal n tesnawit-a, Mass Racid Rebbaɛi, yesnemmer abeɛda wigad i d-yeddan yid-s deg teɣzi n useggas, am wakken yessawel i kra n wid yeqqnen i uḥric-a n tɣuri di temnaḍt-nni ad qedcen s wugar n tnimar ɣer sdat i ussali n uswir d ufmiḍi n usmurres, imi aseggas-a, i telɣut, tewwi-d kan afmiḍi n 54.44%. D ayen i yeǧǧan kra n urbaɛ zeɣnen agemmuḍ-a d umḍiq wis 44 i d-tewwi tesnawit-a 1000 n yimeɣrasen At Mlikec.

Dima ɣef wawal n unemhal n tesnawit-a, lemmer ad ddukklen ugar wid i terza taluft deg tɣiwant-nni, tezmer ad taweḍ qabel tesnawit-a ɣer ufmiḍi n 80% n usmurres di Bakalurya acku wid ara iɛeddin tura i uswir wis kraḍ gerrzen s tlemmasin i sɛan. Ma d ayen yeɛnan allalen ipidagujiyen deg tesnawit-a, tenna-d teɣbalut-nneɣ d akken tura nuḥen ɣur-sen, ɣas ma tuɣ tella aṭas n txessast ilindi. Yeqqim-d ihi yal wa ad yeg amahil-is – inelmaden, imawlan, iselmaden d yimḍebbren – akken ad taẓ tesnawit-a ɣer sdat.

M. K.

- PUBLICITÉ -