Accueil Tamazight Tikli n yimiyupaten

Bgayet : Tikli n yimiyupaten

78
- PUBLICITÉ -

I lmend n wass aɣelnaw n yimeɛḍar, i d-yettuɣalen yal 14 meɣres, heggant-d tddukkliwin i iqeddcen i yidis n umeɛḍur yiwet n tikli akked yimiyupaten d yimeɛḍar akken ad sutren izerfan d ttawil deg tmurt-nsen. Imi ulamek ara mlilen deg yiwen n umḍiq, tella-d yiwet n tikli di Tezmalt, tayeḍ di Bgayet, tayeḍ deg Yiderginen, asamar n Bgayet. Deg Tezmalt dɣa, tebda tikli-nni ɣef 10:00 n tnezzayt, seg uxxam n tddukkla n yimiyupaten n Bgayet (DEFI) armi d taɣiwant, syin akkin i tdayra n Tezmalt. Gar wayen sutren wid i d-yeffɣen s abrid, awenneɛ n liḥala n umeɛḍur di tmurt-is, asishel n ukcam-ines di tmetti, aqeɛɛed n usaḍuf ɣef wayen yerzan izerfan-is akked usemɣer n tjernant-is tamayyurt i yellan d 4 000 n yidinaren ar tura. Ad d-nesmekti d akken ayendin d tiddukkliwin i yekkin deg tikli-a akken ad d-fkent afud i yimeɛḍar, ama d tid n yimdanen at wasrayen uzzigen, tid n yimuḍan n ssker neɣ d tid n lɛali d lxir s umata. « Nella di ttiɛad ass-nni n 14 meɣres akken deg-s ad d-nesmekti ass aɣelnaw n yimeɛḍar, deg-s ad nessuter izerfan-nneɣ di tmurt-nneɣ. Acku ar tura, yettwarkeḍ ḥawla umeɛḍur imi ur as-tga ddula ttawil akken ad iɣer neɣ ad yexdem s teshel, am deg tmura-nniḍen », i aɣ-d-tenna tselwayt n tddukkla n yimiyupaten n Bgayet, Massa Nura Ayt Ɛebderreḥman. Send ad tkemmel ɣef taluft-nniḍen: « Wamma tajernant-nni tamayyurt fiḥel ad d-nini. Ladɣa imi ddula tẓerr-itt d tikci kan, mačči d azref n umeɛḍur. Ɣef waya i tt-tesseḥbes kan di 4 000 n yidinaren seg wacḥal tura d aseggas ». Yewwi-d ad d-nini belli ɣef temsalt-a n tjernant n umeɛḍur, aṭas i d-yekkren deg wayen iɛeddan ssuturen asali-ines, ama d tiddukkliwin, imḍebbren idiganen d yirgazen isertanen, maca yesɛuẓẓug uwanek i tiɣriwin.

- PUBLICITÉ -

M. K.

- PUBLICITÉ -