Seg wakken di tmurt n leqbayel εziz wakal, armi aṭas n temsal i iḍerrun, gar yimdanen, armi menγen ula d irgazen γef tlisa, dγa ula d Ccix Muḥend iqubel aṭas n ddεawi yecban-aya degmi i as-yeqqar:
«La ttnaγen medden γef tmurt
Ur iẓri ḥedd wi tt-ilan
Nekni nettalas deg-s ala lqut
Netta bab-is d sselṭan
I nekni tegguni lmut
Leqrar-nneγ d iẓekwan».
Qqaren, yiwen wass, sin yimdanen, llan d lğiran, yiwen seg-sen d ṭṭameε, iγil ad izdeγ lebda di ddunit, ad yeğğ lğaṛ-is ad iγfel, ad iẓẓiẓ talast ad d-iḥeṛ cwiṭ n wakal. Lğaṛ-is, d uḥdiq. Ifaq maca yessusem. Ṭṭameε, yugi ad yeṛwu, simmal irennu iẓaẓay di tlisa armi yessaweḍ azal n xemsa lmitrat s teγzi deg yiger. Yiwen wass, lğar-is uḥdiq, yeddem-d yeččuṛ tacekkart uqenṭar s wakal, iccud-itt yeğğa-tt. Yessawel-as, yeffeγ-d ṭṭameε, yenna-as i wuḥdiq: “Anεam a lğar”.
Lğar uḥdiq: “Bγiγ kan ad ak-ḍelbeγ ad iyi-tεiwneḍ.
-Ulac uγilif ad ak-εiwneγ, d acu tebγiḍ?
-Ad i yi-tawiḍ tacekkart-inna n wakal s axxam, nekk aql-i uγeγ-tent deg
uzagur-iw. Iruḥ lğar-nni ṭṭameε, ittaεraḍ ad tt-yerfed, ur izmir. “Awah ay aḥbib wagi d awezγi, lukan s-zmireγ mačči d aγilif”, I as-yenna. Yuγal yenna-as wuḥdiq-nni: “Annaγ a lğar ameεzuz, yiwet n tcekkart n wakal ur as-tezmireḍ ara! Tekkreḍ i xemsa n lmitrat s teγzi s tehri”. Yenṭeq ṭṭameε: “Semmeḥ-iyi a lğar i wudem n Ṛebbi.
Yahia Yanes