Ass n arim, 6 deg wayyur-a n maggu, i yebda Remḍan, aggur n tuẓamin ɣur yinselmen. Ɣas tella taluft n teɣlayt n sselɛa, anqas n uqeddic d udebdeb n tmetti, ayen i d-yettrasen i uskasi yal aseggas, ɣur waggagen d yimsujjiyen, d taluft n yimuḍan akked Remḍan, abeɛda wid yettidiren s waṭṭanen idumen. Ayendin d uguren i d-ttmagaren yimdanen-a di tudert n yal ass, teɣzi n 30 n wussan n wayyur n Remḍan. Ɣas ur asen-tefki tezmert-nsen amek ad qqimen i laẓ, imi ula d imsujjiyen-nsen ttwessin-ten dima i tgella, tuget n tegnatin d timetti i asen-iregglen abrid ɣer wučči d ugerrez n waddad. Aya imi anda tnuḥ tḥanut neɣ d taneččit, ad tent-yaf umuḍin medlent lawan n tzeggant n wass. Ɣas ad yebɣu ihi ad yekkes nnzaf, ad yessečč aɛeddis-is mi ara d-yeffeɣ seg uxeddim, ur yettaf ansi ara d-yaɣ aleqqim-nni.
Rnu i waya, yewwi-d ad d-nemmeslay ɣef wugur-nniḍen i d-ttmagaren yimuḍan deg wayyur-a n Remḍan, i yerzan tikkelt-a asegmi d tmuɣli n tmetti. Aṭas n yiqeddacen imuḍan i yettruḥun d « iseflan » n waya acku ugaden ad ččen ɛinani deg yisragen n uxeddim, syin ad asen-yettwakkes umkan neɣ ad d-ggrin deg yimi n medden. Ɣef tnaga n kra n yimuḍan, d imdanen i d-yesseɣlin fell-asen tamara n tɣimit i laẓ, armi yettili wanida ttaḍnen, ttekcamen sbiṭarat. « Ɣas sɛiɣ aṭṭan n tɛebbuḍt seg wacḥal d aseggas tura, maca ttuẓumeɣ ɣef waṭas n ssebbat, gar-asent tignatin d liḥala n tudert n berra », i d-yenna yiwen n ubabat n warrac. Si tama-nniḍen, llan wid i yettkemmilen ttuẓumen ticki ffɣen-d seg umahil ɣef 16:00, imi ttwalin skud ur ufin amek ad smeklin (ad feḍren), yif ma kemmlen i laẓ i lmudden wala!
M. K.