Accueil Tamazight Timlilit n taggara n temsizzelt n ddabex n uḍar

Tahanouts : Timlilit n taggara n temsizzelt n ddabex n uḍar

123
- PUBLICITÉ -

Ass-nni lǧemɛa yezrin,  tameddit n wass, i d-tella temlilit n taggara n temsizzelt n ddabex n uḍar i d-heggan yilmeẓyen n taddart-a. D timlilit n taggara, i iɛeddan deg tegnatin igerrzen, ama si tama n wurar, ama si tama n usuddes. Deg unnar aɣiwan n Ait Aissa Mimoun, yellan di deg umḍiq i wumi qqaren Tiplakine, i d-tella temlilit-agi n taggara. Ttiɛad-agi anaddal, i d-yerran asirem i yilmeẓyen n taddart n Tahanouts, yeḥder-it uselway n tɣiwant Mass Akli Chabane, ɣer yidis n twaculin n yilmeẓyen-nni i wumi xedmen tajmlit. Uqbel beddu n temlilit, tella-d ddqiqa n tsussmi ɣef yiman n yilmeẓyen i wumi gan tajmilt. Syin akkin, yefka-d awal uselway n tɣiwant, Mass Akli Chabane, i d-yennan : “S lferḥ meqqren, i neḥder taggara n temsizzelt-agi n ddabex n uḍar, i d-heggan yilmeẓyen n taddart n Tahanouts. D timsizzelt n tegmat, nessaram ad tkemmel akka gar yilmeẓyen n taddart-a”. Timsizzelt-a n ddabeɣ n uḍar, yebdan aggur tura ɣer deffir, tessaweḍ ad tejmeɛ akk ilmeẓyen n taddart iḥemmlen ddabex. 8 n trebbuyyeɛ n yilmeẓyen n taddart-a, i imḥezwaren ɣef teqbuct n taggara, i yettunefken ass-nni n lǧemɛa iɛeddan. D timsizzelt i d-heggan yilmeẓyen n taddart n Tahanouts, i yilmeẓyen dɣa n taddart-a, yella-d umḥezwar d uqessar gar-asen deg unnar. D tajmlit sɣur yilmeẓyen n taddart-a, i watmaten-nsen ilmeẓyen, i ten-yeǧǧan deg yiseggasen iɛeddan. Mbeɛd mi tekfa temlilit-a, i d-yesddukklen snat n trebbuyeɛ yewwḍen ɣer taggara s ugemmuḍ n yiwen yiswi ɣer wayeḍ. Ɛeddan srid ɣer tyitiwin n zzher (ipinaltiyen), anda i d-tufrar yiwet n terbeɛt s 3 n tyitiwin ɣer yiwet. Mi tekfa temlilit-a, tella-d tmeɣra n taggara, anda ferqen ɣef yimurar n snat n trebbuyeɛ cciɛat. Am wakken diɣ, i fkan taqbuct n taggara n temsizzelt-a, i terbeɛt-nni irebḥen. Di taggara, ad d-nini belli d taddart n Tahanouts, i irebḥen imi gar warraw-is i d-tella temsizzlt-agi n ddabex.

- PUBLICITÉ -

A. A.

- PUBLICITÉ -