Accueil Tamazight Timsirin – Iluɣma – Aseɣti n yiluɣma «Asenfar amezwaru», d amaynut n...

Ajdid deg tira

Timsirin – Iluɣma – Aseɣti n yiluɣma «Asenfar amezwaru», d amaynut n Adel Bachouche.

187

Yessuffeɣ-d uselmad n tmaziɣt Adel Bachouche, adlis-is wis sin deg wussan-a, ɣer teẓrigin Tira. Sin n wagguren kan segmi i d-yessuffeɣ “Tamudemt n tfertin n temsirin”, iḍfer-it-id gma-s s usentel “Timsirin – Iluɣma – Aseɣti n yiluɣma”. Imi ameskar d aselmad yellan deg unnar, yefren ad d-yawi s leqdic-is amaynut ɣef uselmed, akken ad yessiǧhed ugar tamkerḍit n yidlisen n uselmed, acku d annar yesran i tektabin, akken ad yennerni. Ula d imazzagen n tutlayt seg yimesnilsanen d yiselmaden n tesdawit, xeddmen-d tizrawin u ssuffuɣen-d idlisen deg taɣult-a. Adlis-a, yebḍa-t Adel ɣef kraḍ n yiḥricen igejdanen : Timsirin + iluɣma + aseɣti n yiluɣma. D adlis yerzan ahil n uswir wis sin alemmas, n tsuta tis snat. Uqbel yal tamsirt, yettili uḍris, sakin ad d-ḍefrent temsirin n yiferdisen n tutlayt, am tjerrumt, tirawalt d tseftit.

Ɣer taggara n yal tamsirt, ad naf asiteg d yiluɣma. Ineggura-a, ttwaseɣtan deg uḥric aneggaru n udlis. Yerra umeskar lwelha-s ɣer kra n yiḥricen ilan azal deg uselmed s usenfar, am tegnit n tmenna, tamsirt n tmedyezt, tagnit n useɣred akked kra n temsirin n umawal. Ma neddem-d amedya n Tegnit n tmenna, ad t-naf d aḥric s wazal-is deg uselmed atrar, irennun-d abaɣur seg waṭas n tamiwin i unelmad. Nezmer ad as-nsemmi tanfalit s timawit, yezmer ad tt-ibedd uselmad ɣef tɣawsiwin-a; tugniwin, aḍris yuran neɣ ayen yettwali yerna isell-as (audio visuelle). Ma d tizemmar iɣer ara yessiweḍ, ɣef wakken i d-yedda deg udlis n Adel Bachouche; “Tettrebbi anelmad ɣef tmussni n tutlayt akken ad tt-yettmeslay ɣef yiles, asenfali s timawit war uguren, tettekkes leḥya ɣef unelmad ma yella ur yennum ara yettmeslay, tettrebbi-t ad yettqadar tawala-s (nnuba-s) deg tmeslayt”.
Kh. A.