Tberreḥ-d tddukkla tadelsant TUSNA n taddart n tmizart d akken ad tili yiwet n temsizzelt iwumi fkan isem n Meksa Abdelkader, ara d-yeḍrun di taddart n Ubizar. I wakken ad yekki yiwen, ha-t-an wayen i ilaqen. Ad yili leɛmer n yilemẓi gar 8 ɣer 22 n yiseggasen.
2 n tezlatin ara d yextar yilemẓi akked yiwet n tezlit n Meksa Abdelkader. Ad ɛemmren tawriqt n ujerred deg temsizelt ara suffɣen seg usebtar n tddukkla deg facebook, syin ad tt-id-aznen ɣer tansa-agi: [email protected]. Nesteqsa-d aselway n tddukkla Mass Abizar Massinissa ɣef tfaska-agi, yenna-d : “Leqdic-agi d tajmilt i ucennay Meksa abdelkader. I tikkelt tamezwarut ara as-tili tejmilt di taddart-is Abizar. Wid ara yesneqden ilmeẓyen-agi, d iselmaden n uẓawan. Ad nader Mass Kheloufi Hocine. Tajmilt-agi d tagnit i tsuta i d-yettnekkaren akken ad issinen acennay n taddart-nneɣ. I wakken daɣen d tagnit i wid iḥemmlen aẓawan, ad d-sbeggnen timussniwin-nsen akken ad uɣalen d icennayen n uzekka. Ayɣer ala”.
Deg wahil n tfaska, ad tili temlilit akked yiɛeggalen n twacult-is akken ad mmeslayen ɣef tudert-is akked wayen i yexdem. Ad tili diɣ temsikent n tugniwin n unaẓur.
Yexdem uselway n tddukkla tiɣri i yinemhalen n tkebbunay akken ad fkent afus n lemɛawna i uheggi tafaska-agi di tugnatin iwulmen. Wid yebɣan ad ttekkin deg temsizelt, ilaq fell-asen ad aznen tawriqt n ujarred-nsen uqbel 30 /06/2019.
Ad tli tafaska n Meksa Abdelkader ussan ass n, 24 d 25 deg yulyu 2019, deg taddart n Ubizar di lwilaya n Tizi Uzzu.
Yamani Souhila