Teɣra di tesnawit n teqcicin n Micli anda i d-tewwi akayad n BAC. Tekcem ɣer tesdawit n Mulud At Mɛemmer n Tizi-Uzzu anda d-tewwi turagt di tutlayt n tmaziɣt deg useggas n 2012. Ass-a tettunefk-aɣ tegnit, nemlal-itt terra-aɣ-d ɣef yisteqsiyen-nneɣ, akken ad nẓer ugar ɣef tmeddurt-ines d wungal i tura.
Aɣmis n yimaziɣen : Aql-ikem tura tkecmeḍ ɣer sdaxel n unnar n tsekla, amek i t-tufiḍ iman-im deg-s ?
Cabḥa Ben Gana: Tasekla, d yiwen n umaḍal iεeddan akin i tira. Tasekla, d lemri deg-i tezmer tmetti ad twali iman-is. Tasekla, d abrid ur nettfaka ara.
Tira teshel neɣ tuεar?
Tira akken i teshel i tuεer. Teshel, ladɣa ma yili lebɣi-nni, tayri-nni n tira, d tehregt, ma llan tlata-agi ad tḥulfuḍ i yimru d afessas, iteddu-ak di lebɣi. Tuεer, acku tira ur teqqim ara kan di tmenna neɣ deg wayen tebɣiḍ ad d-tiniḍ, ilaq ad teẓreḍ amek ara t-id-tiniḍ, imi ccbaḥa tesεa azal d ameqran di tsekla.
Amsebrid d ungal amezwaru i turiḍ. D acu i akemideggren akken ad t-taruḍ ?
Amsebrid, d taqsiḍt uriɣ kan akka, imi ḥemmleɣ ad aruɣ, ur yi-yella ara yiswi akken ad tt-idsuffɣeɣ d ungal.
Гef leḥsab n wungalinem, tira d ttawil gar ttawilat i swayes tezmer tmeṭṭut ad tennaɣ ɣef tlelli-ines. D acu ara d-tiniḍ ɣef waya ?
D tidet, mmeslayeɣ-d ɣef tlelli n tmeṭṭut deg umsebrid, maca ur qqimeɣ ara kan deg-s, imi amennuɣ n tmeṭṭut tura ur yeqqin ara kan ɣer tlelli-is, tessebεed !
Txedmeḍ aṭas n temliliyin akken ad d-temmeslayeḍ ɣef ungal-inem. Ɣer ɣur-m, d acu d azal-nsent temliliyin yecban tigi ?
Yal timlilit ara xedmeɣ, rennuɣd tamussni ula d nekk. Rnu ɣers, ttwaliɣ udem n tira-inu di tmuɣliwin i yi-d-ttaken yimeɣriyen.
D acu i ibeddlen deg-m deg wasmi tgiḍ timliliyin-agi imi temlaleḍ d imeɣriyen udem ɣer wudem ?
Timliliyin-agi, ttaǧǧant-iyi ad skecbreɣ ugar di tira. Fkant-iyid daɣen tabɣest akken ad fkeɣ ugar, imi tura mačči kan i yiman-iw i ttaruɣ, llan yimeɣriyen ɣer tama-w.
Ahat tebɣiḍ ad d-ternuḍ awal uqbel ad nessali adiwenni-agi?
Ddeqs n wungalen i d-yeffɣen ladɣa aseggas-a, d ayen yessefraḥen! A win yufan kan ad ilin daɣen wid ara asen-yuɣalen s lmendad s usenqed ussnan.
Yesteqsa-tt Fahim Messaoudene