Accueil Tamazight Tirza ɣer teẓgi n Takkuct

At Smaεel

Tirza ɣer teẓgi n Takkuct

37

Asirem Guraya d yiwet n tddukkla i yefkan azal meqqṛen i tezdeg n ugema d ccbaḥa-s, imi gzan d akken imal n tudert n umdan yebna ɣef waddad n tkulugit. D ayen i ten-yeǧǧan qeddcen deg wannar n tẓuṛi tagamant.

Dɣa iswi-nsen d amek ara yeḥrez umdan tawennaḍt anda yettidir. Daymi i εerrḍen ad skeccmen deg wallaɣ n yimdanen abaɣuṛ n ugama d yimɣan-is. Iεeggalen n tddukkla-a, am yal tikkelt, ttawin agraw n warrac d yilemẓiyen s umata, ssufuɣen-ten bac ad d-walin adeg seg yidigan icebḥen ama deg twilayt n Bgayet neɣ beṛṛa-s. Tikkelt-a dɣa, s tallelt n tɣiwant n At Smaɛel, wwin-ten ɣer teẓgi n Takkuct i d-yezgan deg tɣiwant n At Smaεel.

Ccil mačči d tirza-nsen tamezwarut ɣer dinna, imi usan-d yakan ɣer Udrar n Takkuct. Lameεna ccbaḥa d thuski n ugama deg teẓgi-a, tejbed-iten-id i tikkelt tayeḍ. Ama d amezzer s waman-is i itteccruruqen am ddheb, tizegzewt n umkan, neɣ d abeḥri-s aṣemmaḍ azedgan, i d-ttarran rruḥ i wul.

Iεeggalen n tddukkla Asirem Guraya d warrac yerzan ɣer Takkuct, sεeddan ass yelhan nezzeh, imi ufan deg tezgi-a ayen i asen-yehwan. Dɣa ula d aselway-is Mass Ɛemmaṛ Rabḥi, yemmeslay-d ɣef ccbaḥa n umkan-a, am wakken i d-yessuter deg yimḍebbṛen i teεna temsalt, ad d-ḥerrzen amḍiq-a, acku d agerruj s tidet. Γer taggara yesnemmer aselway n tɣiwant n At Smaεel ɣef wayen i ixeddem seg tama-s i uḥraz n twennaḍt-nsen.
K. K.