Tennulfa-d tddukkla n yimiyupaten DEFI di tdayra n Tezmalt, aseggas n 2001. D tameṭṭut tabeɣɣast Nura Ayt Ɛebderreḥman i yellan deffir usnulfu-is s tallelt n yimsujjiyen d kra n medden. Aṭas-aya segmi teccektay tddukkla-a seg lexlas n wallalen idrimanen d yiɣawsanen ara tt-yeǧǧen ad tessemres akken iwata aɣawas-is n tigawin n useggas. Llum, yettili yal tikkelt ɣef yimḍebbren n uɣlif d twilayt n Bgayet abeɛda, ur d-nerri ddhen-nsen ɣer tddukkla-a d yimiyupaten s umata. Dɣa, ussan-a kan, terza-d yiwet n teseqqamut ɣer uxxam n tddukkla akken ad testeqsi ɣef kra n tlufa, ad twali amek tella tddukkla d wacu-tent tsutriwin-is tigejdanin.
Yedda-d deg teseqqamut-a n unadi imwelleh n uɣlif n temsetlelt, anemhal n tigawt tinmettit n Bgayet d unmazul-is. Deg ddeqs n wakud, yella-d uskasi d umbaddal n wawalen gar yiɛeggalen n tddukkla DEFI d wid n teseqqamut-a. Ferḥen ayendin yiɛeggalen n tddukkla-a seg tirza-a i ssaramen ad d-tawi kra n ubeddel i waddad d tudert n yimiyupaten n Bgayet abeɛda. Gar wayen i d-yellan daɣen di tirzi-a, ssutren wid i d-yusan kra n yizmamen i tddukkla DEFI i lmend n unadi-nsen. Ɣef wawal n yiɛeggalen n tddukkla-a n twilayt, tefka-asen akken ilaq s umeẓẓuɣ teseqqamut ɣef wayen sutren deg-s d wayen i as-ccektan ɣef lexsas. Mi tekfa dayen temlilit, ffɣen yimekkiyen ɣer berra anida gan kra n tewlafin i ccfawa. « Nwala aṭas-aya segmi yettwaḍerref umeɛḍur, yettwakkes-as uzref-is. Nessaram ad bdunt ad teddunt tlufa akken ilaq, ad aɣ-yemmag uɛeddi di berra, imi ula d tajernant-nneɣ ad tt-salin », i d-yenna yiwen n umiyupat.
M. K.