Taẓuri sya u sya yegger-as irebbi. Yal ta yesɛa-as akud-ines, yal ta yefka-as azal-ines, yessen akken ma llant ad tent-yesseqnunec.
Yessen-as i uẓawan akked wawal, yekcem s tehri s teɣzi s annar n tsekla anda i d-yessufeɣ adlis-ines amenzu s wudem n tmacahut deg useggas n 2013, azwel-ines « Lexyal n tebḥirt » (Le bonheur d’épouvantail), d adlis i dyeffɣen deg teẓrigin n SEFRABER s kraḍ (3) n tutlayin, taqbaylit, taɛrabt akked tefransist. Tamacahut, yesseḍfer-as
unuɣen i as-yernan aṭas n thuski. Deg useggas n 2012, yufrar-d d amezwaru di Tfaska tageraɣlant n tsekla akked udlis n yilmeẓyen (FELIV) i d-yellan di Lezzayer tamanaɣt, yukan s tmacahut-is yura s tutlayt n tmaziɣt uqbel ad tt-id-yessiẓreg. Wagi d Moe GUETTAF, n taddart n Buzgan. Ilul-d, teddad deg yidammen-is tẓuri. D ilemẓi asmi yebda tira, tira n yisefra akked tmucuha. D ilemẓi yebda yessalay tizlatin. Iḥemmel aṭas ad yessuneɣ, yemmal aṭas ɣer usuneɣ n yifɣal (les caricatures ) ; yessen-as u yesɛa tiktiwin. S yifɣal-ines yessenfalay-d ayen tettidir tmetti deg-i yettidir akked liḥala n tmurt di yal aḥric : timetti d tsertit. Yezga yessrusuy-d ifɣulen-is deg usebter-ines n Facebook. Ussan-agi yezrin yuɣal-d s umaynut n uḍebsi-ines amezwaru, azwel-ines « Tizenqatin » deg-s, ad naf 7 n tezlatin : Eliza, Tizenqatin, Lmalayek, Ttxil-m, Bella Ciao, War tilas, Tafsut-nni. Yal asefru yessels-as aẓawan i yernan fell-as. Yessufeɣ-d deg-s tizlit yecna s ṣṣut-is aḥlawan.
F. M.